Pulom ka jing iakren bad U MR; rai ki nonghikai ban iai bteng ia ka jing iakhih

Shillong:Ki nonghikai, kiba iakhih mynta la saw sngi kynthih, ki la byrngem ba kin nang pynjur shuh ia ka jing iakhih jongki nangne shakhmat.

Ki nonghikai kiba la shah pynduh kam ha ka sorkar jylla, kiba la tip, Meghalaya LP School Contractual Assiociation (MLPSCA) ki la shong ia khih mynta la saw sngi kynthih.

Haba ia kren bad u President ka Meghalaya LP School Contractual Association (MLPSCA) u bah Birbor Riangtem u la ong “Ka jingiakhih kan dang bteng bad ngin dang ia kren ban pynkhreh da ka jing iakhih kaba dang kham jur shuh shuh, hadien ba ka sorkar ka la kyrngah ban iarap ia ngi”.

Ki nonghikai Contractual kiba la duh ia la ka kam, kiba don hapoh ka lama jong ka Meghalaya LP School Contractual Association (MLPSCA), mynta ka sngi ki la leit ban ia kynduh ia u Myntri rangbah ka jylla u Conrad K Sangma ban pynsngew ia ki jingeh.
Kane ka jingiakynduh ka la long ka ba khlem seisoh bad na ka liang ki nonghikai, ki la pynbna ba kin dang bteng ia ka jingiakhih jong ki.
Hadien ka jingiakynduh bad u Myntri rangbah ka jylla ,na ka liang ki nongialam ka MLPSCA, ki la kynnoh ba u Myntri rangbah, ba ha ka jaka ba un sngap ia ka jingeh kiba ki thmu ban pynsngew, u la kynnoh pynban ia ka sorkar ba la dep halor ka jingmad jingeh ki nonghikai.

U bah Riangtem u la ong ba ka jingdawa jong ki ka long ban pynsngew ha u myntri rangbah ba un wad biang ia ki lad ki lynti ban lah ban thung kam biang ia ki.
U la bynrap “Ka jingiakynduh bad u myntri rangbah ka jylla mynta ka sngi, ka long kaba khlem don nia eiei, namar ba u la kren shai ba ka sorkar jylla kan ym lah shuh ban thung kam biang ia ki namar ba kane kan ktah ia ka policy jong ka jylla, khamtam ha kaba ia dei bad ka jingthung kam ia ki nonghikai.
“Ha kane ka jingia kynduh, u myntri rangbah u la kynnoh ia ka sorkar ba rim kaba khlem shim ia ki sienjam kiba donkam ha ka ba ia dei bad ki nonghikai contractual”u la ong.
U bah Riangtem u la ong “Lada ka sorkar jylla ba la dep, ka la leh ia kaba bakla ka dei ka kamram jong ka sorkar, ban pynbeit ia kane bad lada ka sorkar mynta ruh kan bud ia kajuh, ki nongshong shnong baroh ki iap”.