4 Rymphang, ka skul ka SBUK

Shillong, 24’lyngkot:
Ka samoi hikai Khasi kaba ar jong ka Skul Hikai Khasi (Khasi Learning Centre) ba la seng da ka SBUK, kan sdang naduh ka 4 tarik u Rymphang, bad ha katei ka sngi u bah P.N.Syiem, Chief Executive Member jong ka Khasi Hills Autonomous District Council un donlang ban kyrkhu kyrdoh ïa kane ka Skul, ha katei ka tarik, ha Shillong Law College, ha ka por 5 baje nohsngi.
Ha kane ka sngi, kan don ruh ka jingsam ïa ki syrnot sha kito ki nongpule kiba la pyndep ia ki jingpule Khasi ha ka samoi kaba nyngkong jong ka snem 2015-16. Kin don ruh ki jingpule poitri bad jingrwai Khasi kiba shongshit da ki nongpule ki bym dei ki Khasi.
Ka SBUK ka kyrpad ïa ki jingkyrshan bad jingïatrei lang jong ki para-ri baroh ha kane ka kam, ban kyntiew ia ka ktien bad ka thoh ka pule Khasi.