Ki kynhun jong ka Indian Super League, kata ka FC Goa bad ka Bengaluru FC ki la pynmih ia ki kyrteng jong ki rangialehkai jong ki myn hynnin ka sngi, na ka bynta ka jingialang AFC ka ban sa long shen.
Katba ka Goa kan iashim bynta ha ka AFC Champions League, ka Bengaluru pat kan don bynta ha ka AFC Cup qualifiers.
Ka Goa kaba long ka nonglamkhmat jong ka Indian Super League(ISL) ha kaba ka la rah ia ka nam jop ha u snem 2019-2020, ka la pynmih ia ki kyrteng jong ki rangialehkai na Meghalaya kiba kynthup ia u Redeem Tlang, u Aiban Dohling bad u Phrangki Buam ha ka kynhun ba 28 jong ki rangialehkai jong ka. Kane ka kynhun kan ialeh pyrshah ia ka Qatar’s Al-Rayyan ha ka 14 tarik u Iaiong.
U Redeem Tlang u la ialehkai kumba 10 ki match bad 351 minit na ka bynta ka Gaurs dang shen ha ka aiom jong ka ISL 2020-2021 ha kaba u la lah ban thep shisien. U Aiban Dohling u la mih madan kumba 376 minit ha ka jingmihkhmat ka jong u kaba phra sien katba u Phrangki Buam ym pat shym la iohi ia u ha madan hynrei u la shu shong ben beit ha baroh ki 11 tylli ki match jong u.
U Eugeneson Lyngdoh ba la mihkhmat na ka Bengaluru B Team ha ka local league ha Karnataka, ha kaba kane kynhun ka la long ka kynhun kaba wan ba ar ha ka ka jingialehkai kaba dang shu dep shen. Ka jingtbit ka jong u ban ialehkai ha katei ka game ka la pynlong ia u Coach uba thymmai jong ka Bengaluru u Marco Pezzaiuoli ban iohi ha kaba u la shah ialam ban pyntbit shuh shuh bad ki kynhun kiba khlaiñ bad mynta u la poi sha ka kynhun ba 29 jong ki rangialehkai. U Lyngdoh u dei uwei na ki san ngut ki kynhun nongialehkai kiba kyrpang u ba la poi sha ka liang jong ki nongialehkai kiba tbit bad kiba khlaiñ.
Ka BFC ka la pyntip hynnin ka sngi khlem da pynpaw iaki kyrteng, ba 3 ngut ki nongialehkai bad ki nongiarap ki la ioh ia ka jingpang Covid 19 hynrei ka jingiakhun pyrshah ia ka Nepalese side Tribhuvan Army FC kan iaid beit shakhmat khlem da don jingwit ka ban long ha ka 14 tarik u Iaiong 2021.
Phi don ban ong eiei?