4 kol pynliem ka Pahamsyiem ïa ka WE FC ha ka PSCC

Nongpoh: Ban nang kyntiew ïa ka kam ïalehkai football bad ruh ban plie lad ïa ki khun samla kiba don ka sap ïalehkai football ba kin ioh ïa ka rynsan ban pynpaw paidbah ïa la ka sap ka phong bad ruh ban kiew ha kane ka kam ïalehkai football, ka Pahamsyiem Sport & Cultural Club myn hynnin ka sngi ka la plie pyrda syndon ïa ka lympung ïalehkai football kaba la ai kyrteng kum ka Invitation Football Tournament 2019 ïa kaba la pynlong hapoh ka madan ïalehkai jong ka NSCA, Mini Stadium Pahamsyiem.

Ïa kane ka lympung ïalehkai la wan ban plie paidbah da u Bah Balajied Rani, MDC ka Nongpoh Constituency kum u kongsan ha ka jingïadonlang ruh u ki riew rangbah kiba kynthup naduh u Bah Plielad Tiewsoh, u Bah Larsing Kharsahnoh, Rangbah Shnong ka Pahamsyiem, u Bah Elington Syiem, President ka Pahamsyiem Sport & Cultural Club lem bad kiwei kiwei ki riew rangbah ka thain.
Kumba la pyntip, haduh 33 tylli ki kynhun ki la poi ban ïa shimbynta ha kane ka lympung ïalehkai football kiban ïa knieh ban iohrah ïa ka nam lahduh bad ruh ïa ka song pisa kaba 20 hajar tyngka na ka bynta ka kynhun lahduh bad 10 hajar tyngka na ka bynta ka kynhun kaba wan ba-ar.
La sakhi ïa ka jingïakhun kaba itynnad bad kaba ïakhaid bormet bha hapdeng ka Pahamsyiem Sport Club pyrshah ïa ka kynhun WE Football Club ha kane ka jingïakhun ka Pahamsyiem ka la lah ban pynliem noh ïa ka WE fc da 4-0. Katba ha ka jingïakhun kaba ar ka Umling Sport Club ka la pynliem noh ïa ka Pahamriniai sport Club da 2-0.