Shillong: 12,481 ngut ki nonghikai skul SSA kiba don hapoh ka lama jong ka Meghalaya School Teachers Association kim shym la ioh tulop la 4 bnai kynthih mynta kumjuh ka Arrear kaba 8 bnai kaba dei na ka bynta u snem 2016-17. U President katei ka kynhun ki nonghikai SSA u bah Aristotle C Rymbai u la ong ba ka jingbym ioh tulop la 4 bnai bad ka Arrear jong u snem 2016-17 kaba 8 bnai ka la ktah bha ia ki nonghikai kiba donkam ban pyndap ia ka jingdonkam ka ïng ka sem jong ki.
U la ong ba katei ka jingbym ioh tulop kam ktah tang ia ki 12,481 ngut hynrei ka la ktah lut ia ka ing ka sem jong ki bad ka ktah ruh ia ka jingmut jingpyrkhat namar ki jingjynjar. U la ong ba katei ka jingbym ioh tulop ka la ktah khamtam ia kito ki nonghikai kiba hap ban shong kali haba ki leit sha jaka hikai jong ki. U la kyrpad ia ka sorkar ba kan phai khmat bad shimkhia ia ka jingeh ki nonghikai.