4 bnai tulop, yn siew noh ka sorkar jylla, ia ki nonghikai SSA

Shillong: Ki nonghikai SSA, mynhynnin ka sngi ki pynpaw ia ka jing sngewhun, hadien ba ki la ioh ban ia kyn duh bad pynsngew ia ki jingeh jong ki, hakhmat u Symbud Myntri rangbah ka jylla u bah Prestone Tynsong.

Hadien ka jingialang, na ka ling u bah Aristotle Rymbai u president ka MSSASA u la iathuh ba ka jingialang ka ba la pynlong mynta ka sngi bad u symbud myntri rangbah ka jylla ka la long kaba seisoh.

“Na ka liang ka sorkar ka la kular ba kan pyllait ia ka pisa ka ban long T.122 klur na ka bynta ka tulop ki nonghikai SSA bad kane kan long T.44 klur ka tulop jong u bnai Rymmang bad u bnai lber bad ka sorkar kan sei ruh T.78 klur na ka corpus fund, na ka bynta ban pyllait noh ia ka tulop ki nonghikai SSA”, la ong u bah Rymbai.
Ka Sorkar mynta ka sngi, ka la shim ia ka rai ban pyllait noh shwa ia ka tulop kaba saw bnai bad na ka bynta shibnai ka sorkar kan sa pynlait, ynda ka la ioh ia ka, na ka sorkar pdeng ia ka 1st installment”u la bynrap.

U bah Rymbai u la ong ruh “Mynta ka sngi na ka liang u Myntri rangbah ka jylla bad u Symbud Myntri rangbah kin leit sha Delhi ban ia kynduh ia ka Union Minister jong ka tnad finance bad ka tnad pule jong ka sorkar pdeng ban iakren halor ka jingpyllait ia ka pisa na ka bynta u snem 2022-23” .
U la bynrap ruh “Ngi la ioh ruh ban iakren halor ka jingdawa ban pynkiew tulop ia ki nonghikai SSA, ha kaba ngi la rai ban kane ka mat yn bishar bniah bha da ka Education Commission, ynda ki la thung ia ka” .
“Halor ka jingpynslem ban siew ia ka tulop, kaba hadien saw san bnai ngi ki nonghikai ngin hap mih shi mih sha surok ban dawa, mynta ha kane ka jingialang ngi la ioh ban ia kren bad shim ia ka rai ba ka sorkar ka dei ban siew thikna noh man ka lai bnai bad na ka liang ka sorkar ka la kohnguh ia kane ka jingdawa jong ngi”u la iathuh.

Haba kylli halor ka rai ban weng noh ia ka jingiakhih, u bah Rymbai u la ong “Ka jingshimrai kaba khadduh kan long hadien ba ki nonghikai kin ioh ban long ka jingialang ban iamir jingmut, halor kane ka bynta”.
“Ka jingweng noh ia ka jingiakhih ngin sa shim ia ka rai ynda ngi la don ka jingialang, hynrei ka jingiakynduh mynta ka sngi bad u Symbud myntri rangbah ka jylla ka long kaba seisoh namar ba ngi la ioh ia ka jubab ka ba shai”u la ong.