Shillong: U Lamphang ka iing dorbar ka KHADC u bah Pynshngain N Syiem, u la kam ka daw ka jingrai jongu ban jied ne ban ai ia ka vote sha ka liangsynpyrshah ka dei hadien ba la pynshong nongrim bha ia ka jingiatainia ha iing dorbar.
“Kam don eiei ia nga kum u chairman hynrei ka daw kaba nga jied ban ai ia ka vote sha ka liangpyrshah ka long hadien ba la sngap bha ia ka jingiatainia ha iing dorbar”, la ong u bah Pynshngain.
Haba kylli kaei ka daw kaba pynlong ia u ban jied ban ai vote sha ka liangpyrshah, u bah Pynshngain u la kynthah ia ka EC da kaba ong, “Tang ka Salary Amendment Bill ne ka Bill ban pynkiew tulop ia ki MDC, ka shim por tang ha Secretariat”, la ong u bah Pynshngain.
Haba kylli hato un shah shim pynshitom ha ka party, la ong ba ha kaba kut hap ban pyrkhat ia ki paidbah ym ia ka party bad u la ong ba ka Citizenship Amendment Bill (CAB) ruh ka EC kam shym la shim khia ha kaba ka la dei ban khot ia ki khlieh nongsynshar shnong ban iakren halor kane.
Ha kajuh ka por, u la kyntait ban shimti CEM hynrei u la kam ba un neh beit ha ka kam chairman ka Council.
Ka Executive Committee ba ialam u CEM u bah Teinwel Dkhar ka la kylla rit paid hadien ba u Bah Pynshngain kum u lamphang ka iing dorbar u la ai ka jingkyrshan sha ka liangpyrshah namar ba ka la don ka jingiakhaid ha ka jingiathep vote mynta ka sngi ha iing dorbar.
Katkum ka jingong u bah Pynshngain, ka rai jongu kam dei ba shah pynbor na ka party nalor hynrei ka dei katkum ka jingsngewthuh jongu.
Phi don ban ong eiei?