Shillong, 7 Jymmang:
Ki don 3 ngut kiba la paw kyrteng ha Mawkyr-wat konstitwensi ki ban ia knieh tiket na ka seng Congress ban ia khun ha ka elekshon MLA 2018. Ki lad khubor ki la iathuh ba kitei baroh 3 ngut mynta ki la iaid bha ha Mawkyrwat konstitwensi ban ia kynduh ia ki paidbah bad ban pynithuh ialade bad ban pynpaw ruh ba ki don jingthmu ban ia khun ia ka elekshon 2018.
Kitei ki 3 ngut kiba la paw kyrteng ban ia knieh tiket Congress ki long u MLA ba mynta uba dei ruh u symbud myntri rangbah barim ka sorkar jylla u bah Rowell Lyngdoh, u MDC ka Langrin u bah Manstudy Nongrem bad uwei pat u bah Kynpham Kharlyngdoh u President barim ka KSU Delhi kumjuh u Assistant Education Secretary barim ka KSU Sengkmie uba la pyniasoh ialade sha ka seng Congress.
Haba ia kren bad u Rupang u bah Rowell u ba dei ruh u MLA ba mynta ka Mawkyrwat u la iathuh ba u la pynkhreh ialade ban ia khun ha u 2018. Haba la kylli pat la un dang thikna ne em, ba un ioh tiket na ka seng Congress, utei u rangbah, ula ong “Ia ka tiket yn sa ia kren, ynda la dei ka por elekshon bad ynda haba ka Congress kan khot aplikeshon”. U bah Rowel, u iathuh ruh ba um don ka jingartatien, ban ioh tiket ha u 2018 naba u dang dei U MLA ba mynta jong katei ka seng.
Kiwei pat ki lad khubor, ki iathuh ba utei u rangbah, mynta um da don shuh ka jingiajan bad ki nongialam rangbah ka Congress ha ka jylla, wat la u dei u MLA Congress ruh bad la iathuh ba kiba bun ki nongkyrshan jong u ki la duh jingkyrmen ba un ioh ia ka tiket bad ki la suba ba ia ka tiket lah ban ioh u MDC ka Langrin u bah Manstudy Nongrem ha kaba ki la iathuh ba utei u MDC u don ka jingiadei ba khamjan bad ka sorkar kumjuh ki heh Congress, khamtam u myntri rangbah u Dr.Mukul Sangma ban ia u bah Rowell. Ki lad khubor ki la iathuh ruh ba u bah Rowell u la leit Delhi ban ia kynduh ia ka President rangbah jong ka seng Congress ka Sonia Gandhi, hynrei haba ia kren bad u, u la kyntait bad u ong ba u khlem leit satia sha Delhi ban iakren ia ka tiket elekshon 2018.
Phi don ban ong eiei?