3ngut ki kyrtong MDC ka Congress

Nongstoin, 19 Nailur:
Ka District Congress Committee, West Khasi Hills ka la pynlong ia ka jingialang ba kyrpang na ka bynta ban jied ia ki lai ngut ki kyrtong ki ban iakhun ia ka election shiteng samoi jong ki MDC sha ka KHADC ka ban sa long shen, ha katei ka jing ialang la khot lang ruh ia ki lai tylli ki BCC ba kynthup ia ka Mawthad-raishan, Rambrai bad Mairang na ka bynta ban pynkhreh ia katei ka election.
U bah Gabriel Wahlang haba iakren bad ki nongthoh khubor mynta ka sngi u la ong ba ka jingthmu ba kongsan jong katei ka jingialang ka long na ka bynta ban pynkhreh ia ka election MDC shiteng samoi bad ruh ban nang pynkhlain shuh shuh ia ka party lem bad ki mat treikam jongka.
Shuh shuh u bah Wahlang u la iathuh ruh ba ka Party ka la dep ban jied ia ki laingut ki kyrtong ki ban iakhun ha katei ka election MDC kaba shiteng samoi bad kitei ki lain gut ki kynthup ia u bah Ioanis Lyngdoh u ban iakhun napoh Mawthadraishan Constituency, u bah Lambok Nongrang na Mairang bad u Bah Kimfa Marbaniang na Rambrai Jyrngam.
“Ngi la ia shong ia ka jingialang ba kyrpang hynne ka sngi bad kitei ki laingut ki kyrtong lem bad ki nongialam na ki 5 tylli ki Block ngi la ioh ban iakren sani bha na ka bynta kumno ban gin nang iaid shakhmat ia ki kam ki jam bad ngi la shim ruh ia ka report treikam na baroh ki san tylli ki Block ka WKH” ong u bah Wahlang.
Ha katei ka jingialang la iadonlang ruh u Working President ka MPCC U bah James Lyngdoh, u General Secretary ka MPCC u bah Mansturday Nongrem u ba dei khmih ruh ia ka kam election ha WKH, u bah Boldness Nongum, President ka WKHDCC lem bad kiwei kiwei ki heh nongialam katei ka seng.
Ha katei ka sngi la jied ruh a u bah JTS Thongni kum u Working President ka District Congress Committee.