3kynta iather ki pulit bad ki GNLA, kyllon iap uwei

Shillong, 19 Naitung:
Ki pulit jong ka East Garo hills ki la ioh ban khyrwit iap ia uwei u snar ka GNLA uba bat kum u Lance Corporal ba la tip kyrteng kum u Pilon M Sangma ha ka jingiakhun hynne ka sngi.
Na utei u dkhot ka GNLA, ki pulit ki la ioh kurup ruh kawei ka suloi AK 47 bad ka synduk thep kuli, kawei ka pistol na US ka .45 pistol kaba lah ban siat hynniew sien bad uwei u bomb grenade, ar tylli ki wireless, ka identity card ka GNLA bad ki kot ki sla.
Kane ka jingjia ka long ha shnong Bangsamgre ha East Garo Hills ha jaka riehtngen jong u commander ka GNLA u Jimmy Momin ha katei ka shnong. U SP ka East Garo Hills u JFK Marak u la iathuh ba ki pulit lem bad ki SWAT bad ki COBRA ki la pynlong ia ka jinghiar thma ha katei ka jaka kaba jngai kumba 25 kilometre na Williamnagar.Ki la pynlong ia ka jinghiar thma ia katei ka jaka hadien ba la ioh ia ka jingtip ia ka jingdon jong kitei ki lehnoh ka GNLA kiba pynlong kum ka jaka riehtngen.
Ha kane ka jingiakhun, kaba la neh kumba lai kynta, utei u dkhot ka seng u la kyllon na ka jingdei ki kuli.
Ki pulit ki la pynlong ia ka jingkhynra hadien ba ki la ioh jingtip
ia ka jingdon jong ki dkhot ka GNLA ha katei ka shnong.
Lah ban kdew ba ha kane ka sngi Palei, ki pulit jong ka East Garo hills ki la ioh kurup ki tiar siat na kawei ka kali kiba suba jur ba dei jong ka seng GNLA ha Chinabat. Uwei u briew u la shah kem halor kane ka jingjia.