38 percent, kiba thep vote MP sha Block II, ong ka KSU

Shillong, 11 Iaiong:
Ka jingleit thep vote sha ki bynta jong ka Block II, ka hiar haduh 38 percent, ha ka elekshon MP, ba ladep, ong U Bah F Kharkamni, President jong ka KSU North Khasi Hills District.
Na ka jing ia thuh jong U bah Kharkamni, la sngewthuh ba kitei ki kaikhlaw, ki la pynlong da ka pakhang shnong, ha katei ka sngi thep vote bad ka dei katei, kaba la ktah shibun eh, ia ki nong thep vote, ha ki lai tylli ki jaka thep vote ha Khyndoo Soo, ha Mawlasnai A bad Mawlasnai B.
Utei u nongialam jong katei ka seng samla pule, u iathuh ruh, ba ki don 2hajar ki vote, tang kiba la pynrung da ka KSU, ha u snem 2013, ha shwa ka elekshon MLA bad kumta, u shim, ba ka jingduh thep vote, ka dei kaba la bun bha ha katei ka sngi jied MP, na bynta ka Shillong Lok Sabbha Constituency.
La iathuh shuh shuh, ba kitei ki kaikhlaw Karbi Peoples Liberation Tiger (KPLT), ki la sdang ban pyntieng koh tympan ia ki paidbah, naduh ka miet jong ka 8tarik mynta u bnai bad u iathuh shuh shuh, ba ki don ki kali, kiba leit shwa ia ki nongthep vote ruh, kiba la shah beh noh, ha kitei ki kaikhlaw.
Ka jingkylli jong utei u nongialam ka KSU North Khasi Hills, ka long “Balei ba ki bor sorkar, kim pynkhlain ia ka jingpahara sha kitei ki jaka, haba ki la tip, ba ki dei kiba don jingma bad u iathuh ba ki pulit, ki duna bha, ha katei ka sngi jied MP ha Khyndoo Soo bad ha kiwei de ki jaka thep vote”.
U bah Kharkamni, u ong shuh shuh ba katei ka jingleh jong kitei ki lehnoh Karbi, kan pynlong ia ka seng KSU, ba kan pyrkhat da kumwei pat, namar ba ki don bun bah ki jaitbynriew Karbi, kiba sah sha Ri Bhoi bad kiba ym ju don ba pynthut satia, ha ka kam ka trei jongki.