34 na Banalari, 18 na Stanley Roy bad 20 na Modrina Lap ka KSU ia ki bar jylla bym don kot don sla

Shillong,18 Nailar:
Ka KSU Mawlai Circle hapoh ka jingialam u President u samla Biangbor Paliar bad u General Secretary u samla Rapbor Nongrum, mynta ka lah sngi u Blei ki la leit ban khynra ia ki nongbylla kiba dei ki bar jylla kiba shong ba sah hapoh u pud u sam ka Mawlai bad ki bym don ia ki kot ki sla kiba biang.
Ha katei ka jingleit khynra ka KSU ka la leit ha ki kad bah jong ka jaka khaii kali kiba don ha Mawlai. Ha katei ka jingleit khynra ka KSU ka la lap ba ki don haduh 72 ngut ki bar jylla kiba trei ha kitei ki jaka khaii kali ki bym don ia ki kot ki sla kiba biang. Na Banalari World Cars ka KSU ka la lap ba ki don haduh 34 ngut ki bar jylla, na Stanley Roy ki la don haduh 18 ngut bad na Modrina ki don haduh 20 ngut, baroh kitei ki nongbylla ki dei ki bym don ia ki kot ki sla kiba biang.
Haba ia kren bad u General Secretary ka KSU Mawlai Circle u bah Rapbor Nongrum u la iathuh ba ka jingleit ka KSU ha kitei ki lai tylli ki jaka ka long ban peit la ki bar jylla kiba trei hangtei ki don ne-em ia ka Work Permit, bad ha katei ka jingleit khynra ka KSU ka la lap ba baroh kim don ia ka Work Permit katba don napdeng jong ki kiba don tang ka Labour License kaba ki la ioh na District Council.
U GS ka KSU u la ong ba kaba sngewsih ha katei ka jingleit khynra ba ka seng ka la lap ka long ba ha Banalari World Cars bad ha Modrina ki don ki nongtrei kiba la ialam bad khun bad tnga bad ki ia sah ruh baroh shiing shisem, u GS u la kynthoh ba katei kam dei shuh ka jingwan bylla hynrei ka dei ka jingwa buhai shnong ha kane ka jylla. U la iathuh ba ha ka jingiakren bad ki trai jong kitei ki jaka khaii ki la kular ha ka seng ba kin beh lut ia kitei ki nongbylla kiba wanrah bad khun bad tnga, u GS u la ong ruh ba baroh kitei kim don ki jingpynshisha na ki pulit , kumta ka seng kam tip la ki dei ki briew kiba bha ne kiba sniew ( Police Verification).
Ka KSU Mawlai ka la ai por ar taiew ia ki nongtrei kiba trei ha Stanley Roy bad ia ki nongtrei hapoh Modrina pat ka seng ka la shim ia ka rai ban beh lut ia ki baroh, ha Banalari ka seng ka la lap ba ki don ki nongtrei kiba dang aplai ia ka work Permit bad kim pat ioh haduh mynta ruh, bad la ai por tang ia kito kiba don hapoh ka thup kyrteng ban pynshisha ba ki la aplai katba ia kiwei pat ki bym biang ia ka work permit la beh noh, kaba na ka liang ki trai ruh ki la kubur ban beh noh hi mardor ia ki.