32 ngut ki nongbylla bar jylla, lap ka HYC

Shillong, 27 Risaw:
Ka HYC Maw ryngkneng circle ha ka 25 tarik u Risaw 2014 ha ka jingialam jong u President Riskhem Kharkamni bad Organising secretary Samla Banteilang Pyng rope ryngkat bad ki dkhot ka la leit ban jurip ia ka Toll Gate Plaza ka ba don hapoh Mawkhanu, East khasi Hills District. Bad ha katei ka jing leit jurip ka seng ka la lap ba haduh 32 ngut ki nongtrei hapoh jong katei ki bym shym la don ki kot ki sla kiba biang. Kumta na ka liang ka seng ka la phah sangeh shwa noh ia kitei ki nongtrei tad haduh ba kin da lah ban pynbiang ia ki kot ki sla ki ba donkam.
Ka HYC ka kyntu ia ki bor sorkar kum ka Labour department bad KHADC ba kim dei ban ai laitluid ia ki Trading license bad Work permit ia ki bar jylla namar ka long kaba ap jingma ia ki paid ka Bri U Hynniew Trep. Ha kajuh ka por ka seng ka lap ruh ba don tang khyndiat ngut ki nong trei kiba dei ki trai ri trai muluk katba ki kam kiba dei ban trei ha ka tei ka jaka ki dei ki kam kiba lah ban trei hi ki samla jong ka Bri u Hynniewtrep. Kumta na ka liang ka seng ka kyntu jur ia ki bor ba dei peit ba kidei ban ailad shwa ia ki samla jong ka thain namar dang bun ki samla ki bym pat ioh kam ioh jam.