318 ki kes lehbeiñ khynnah ki dang sahteng

Shillong, 13 Risaw:
Ki don haduh 318 tylli ki kes kiba ki khynnah ki la shah lehbeiñ ki ba dang sahteng ha ingbishar haduh kine ki sngi ruh. Kitei ki dei ki kes kiba la jia ha ki hynriew tylli ki District tang hapoh 5 snem. Na ki 318 tylli -93 tylli dei kiba la jia ha East Khasi Hills, 38 ha West Khasi Hills, 100 tylli ha Ri-Bhoi, 42 tylli ha West Jaintia Hills, 39 tylli ha West Garo Hills bad 6 tylli ha East Garo Hills,kitei ki dei kiba sahteng ha ka Special Court ba la buh ha kitei ki District. Katba 99 tylli ki kes pat dei kiba sahteng ha District Council Court ha East Khasi Hills.
Katkum ka aiñ Protection of Children from Sexual Offences (POCSO) Act, ka Special Court ka dei ban pynkut ia ka kes hapoh ka shisnem, hynrei haduh mynta ha ki san snem la ong ba la pyndep dang 4 tylli ki kes. Ka chairperson ka Meghalaya State Commission for Protection of Child Rights (MSCPCR) ka kong Meena Kharkongor ba kum ia kitei ki kes pyrshah ia ki khynnah rit dei ban pyndep hapoh shisnem katkum ka POCSO Act bad ka la ong ba lada pynslem kan ktah pynban ia ka khynnah namarba katba nangiaid ki sngi ka rta jong ka ruh ka nangheh.
Ka la ong ba donkam ban don noh ka ingbishar ka ban peit beit thik tang ia ki jingshah thombor ki kynthei bad ki khynnah khnang ban lah ban pynsted ban ai ia ka rai.Kakong Meena ka la ong ruh ba ki kes kiba sahteng ha District Council Court ym shym la pynhap hapoh ka POSCOAct hynrei la shim kum kiwei pat ki kes jong ka section 375 bad 376 jong ka Indian Penalty Code (IPC). Ka la iathuh ba ka la thoh sha ka tnad aiñ ka sorkar ba ka dei ban phah noh ia kitei ki kes sha ka special court namarba ka POCSO ka la treikam nadh u 2012.