31 tarik yn plie ia ka Nazareth Hospital Unit ha Phramer

Jowai, 27 Lber:
U Bishop ka Jylla Niam Jowai (Jowai Diocese) ha ka jingpyllait khubor hynnin ka sngi, ha Jalaphet, East Jaintia Hills District, u la ong ki Sister kiba pyniaid ia ka Nazareth Hospital, Shillong kin wan ban plie ia ka Nazareth Hospital Unit, ha Lad Pasyih-Phramer ha kane ka 31 tarik mynta u bnai.
La ong ruh ha shwa ban plie ha ka por 9.30 mynstep yn don ka jingialang kaba lyngkot bad ka jingkren kyrkhu kyrdoh ia ki doktor bad naduh ka por 10 baje ki Doktor kin sdang ka jingpeit ia ki Nongpang bad ai dawai.Ha kane ka 31 tarik yn wan da ki Surgery Doktor bad ki Medicine Doktor bad ha ka 4.4.2017 (Tuesday) ki Gynnae Doktor bad Pediatric Doktor.
Kane ka jingwan ki Doktor Nazareth ha Phramer, kum ka jingsdang kin wan arsien shitaiew man la ka sngi Thohdieng (Friday) bad sngi sngi ba-ar (Tuesday) jong ka taiew pynthikna shuh shuh ka Dr. Sister Noreen, Nazareth Hospital Shillong.
Ha ka 31 tarik Lber 2017, un wan U Dr. Rangat (Consultant Surgery) Nazareth Hospital bad ka Team jong u. Kino kino ki Nongpang kiba kwah ban phah peit ha kine ki Doktor jong ka Nazareth Hospital, ki lah ban wan phah peit ialade ha kine ki Doktor ha man la ka sngi Thohdieng bad sngi Ba-ar jong ka taiew, kyntu u Bishop Victor Lyngdoh ka Jylla niam Jowai.