31 tarik, yn leh burom ia u Conrad & Prestone

Nongstoiñ: Hadien ba ka Supreme Court jong ka Ri India kala pynmih ia ka hukum ban ithuh noh ia ka hok longtrai ha ka khyndew ka shyiap na ka liang jong ka Hima Hima Nongstoin Land Owner Coal Traders & Producer Association kala pynbna ba kan sa pynlong ia ka jingpynkup burom
bad ban pyneh rngiew ia ki nongialam ka seng kiba la trei miet bad sngi na ka bynta ban iakhun mukotduma halor u dewiong.
Katei ka rai jong ka HNLOCT&PA kala mih ha ka jingialang kaba la long hynne ka janmiet jong ka 12 tarik u Naitung ha Nongstoiñ bad na ka liang jong ka HNLOCT&PA ka la rai ban pynkup burom ruh ia u Myntri Rangbah ka jylla u Conrad K Sangma, kumjuh ia u Symbud Myntri Rangbah namar ka jingshimkhia ka jong ki bad ka jingiadon bynta jong ka sorkar jylla ban iakhun ia katei ka mukotduma halor ka kam tih dewiong.
Ym tang kata na ka liang jong ka Association kala pynbna ba kan pynkup burom lang ruh iaki nongsynshar Hima naduh ki Syiem kiba la iadonkti ban pynjop bad ban pynehrngiew halor ka rai jong ka Supreme Court ban ithuh iaka hok longtrai iaka khyndew ka shyiap.
U bah Apsharailang Syiem Secretary jong ka Association haba kren bad ki lad pathai khubor u la iathuh ba katei ka jingthmu jong ka Association kadei halor ka jingthgmu ban pynehrngiew iaka rai kaba donkam tam haka pateng jong ki khun ki hajar bad ka bri u hynniewtrep ia kaba ngi ju kam borabor tang da ka ktien iaka hok jong ka khyndew ka shyiap hynrei mynta la iathuh syndon da ka ain lyngba ka iing bishar ba ha khliehduh jong ka ri india.
Shuh shuh u la iathuh ruh ba ka jinglong trai jong ki khasi iaka khyndew ka shyiap la ithuh tang da ki dohlieh haka por ba ki synshar iaka ri india bad iaka ri Khasi kumjuh hynrei hadien ba ki dohlieh ki la mih noh na ri khasi ka sorkar kam pat shym la ithuh iaka hok jongngi ki khasi halor ka bat khyndew bat shyiap ia kaba baroh shikatta ngi shu kam hynrei ka ain kam pat shym la ithuh, kumta mynta ngi la ioh ia kaba ngi la thrang baroh shi katta ha kaba katei ka jingpynkup burom kan da sahjit bad ba ka pyrthei kan tip.
Ia katei ka jingpynkup burom yn pynlong ha ka 31 tarik mynta u bnai hapoh ka shnong Nongpyndeng ha kaba ka Association ka iawer ia baroh ki nongsynshar shnong synshar thaw, ki riew rangbah shynrang bad kynthei bad ki samla shynrang bad kytnthei.