30tarik, ka jing duwai ban beh ia ka khlam covid

Shillong:Ka jingiai syllad tyngeh jong ka khlam Covid-19 ha ka jylla ka la long kaba shyrkhei bha bad da ki spah ngut ki mynsiem briew ruh ki la duh noh ia la ka jong ka jingim namar kane ka ka khlam, kumta ha ka 30 tarik u Jymmang 2021, ka jylla kan pynlong ia ka jingduwai lang kaba kyrpang na ka bynta kito kiba dang don hapdeng ka jingiakhun bad une u khniang ba kin shait kin khlaiñ noh, na ka bynta kito kiba la duh noh ia la ka jong ka jingim na ka jingwanlynshop jong kane ka khlam ba kin ioh ia ka jingjahthait ka bym ju kut bad kumjuh ruh na ka bynta ka jingkoit jingkhiah ha ka jylla hi baroh kawei.

Haba kren sha ki lad pathai khubor, u Myntri ba dei khmih ia ka tnad ka koit ka khiah, u Bah AL Hek u la ong ba ia kane ka jingduwai ba kyrpang yn pynlong ha ka sngi u Blei kata ka 30 tarik u Jymmang ha ka por 12 baje mynsngi thik bad u la kyntu ia baroh ki paidbah jong ka jylla ba kin ia don bynta lem ha kane ka jingiaduwai na la ki jong ki iing ki sem ki jong ki bad kam pher lada ki don ha kano kano ka jingngeit ruh.