300ngut trei kam ki bar Jylla, khlem ki kot ba biang

Shillong, 16 Naiwieng:
300ngut ki nong trei bar Jylla, kiba trei ha ki saw tylli ki kom peni, ha Ri War Shella, ki dei kiba khlem ki kot ki sla kiba biang. Ym tang katta, hynrei ka kompeni kaba pyntrei ia ka kam tih mawshun, jong ka Lafarge, ka trei da ka laisen, kaba la kut por.
La lap ia kitei ki jingshisha, haba ka Hynniewtrep Youth Council ( HYC) Ri-War Shella Circle, ka la leit ban jurip bad ban peit bniah ia ki kot ki sla, kynthup ia ki laisen khaii pateng jong ki kompeni bapher bapher, kiba treikam ha katei ka thain, kata ka Lafarge Umiam Mining Pvt.Ltd, Saumya Mining Pvt.Ltd,Ex-servicemen Security Agency, Cummins.
Ha katei ka jingleit jurip ha ka 10 tarik u Nai wieng ka HYC, ka la lap ba ki la don haduh kumba 300 ngut eiei ki nongtrei bar jylla, hynrei kaba bun na ki kim don ia ki laisen nongbylla bad ka seng ka la ai por ia ki ba kin pynbiang ia ki kot ki sla.
Ka HYC, ka la lap ruh ba nalor kitei ki nongtrei bylla, ka la don sa kawei pat ka kontraktor jong ka Lafarge kaba haduh mynta, ka treikam da ka laisen kaba la kut por kaba la ioh na ka District Council. Ka Saumya Mining Pvt.Ltd ka la treikam da ka Laisen kaba la kut naduh ka 31 tarik u lber, 2014. Katei ka Laisen kaba ioh na KHADC ha ka 26 tarik u naitung 2013, ka dei kaba u Bhagwan Singh u la siew T.15 hajar tyngka sha ka Council, da kaba pyni ruh ba ka jingtreikam katei ka laisen kan long ha Nongtrai, Shella.
Ka HYC ka la ai por shi taiew ia katei ka kontraktor ban pynbiang ia ki kot ki sla kiba biang, lym kumta ka la byrngem ba kan sa leit ban pynsangeh ia ka jingtreikam katei ka kontraktor. Halor katei ka jinglap ba katei ka kontrak ka treikam da ka laisen kaba la kut por, ka HYC ka la pynpaw ka jinglyngngoh bad ka la buh da ka jingkylli balei katei ka jingjia ka wan jia , “Hato ka dei ka jingbym tip ka Council ne ka dei ba ka don eiei shalyndet? Ne ki don jingduna ha ka jingtreikam ka Council?” ong ka kyrwoh na u President ka HYC Ri-War Shella Circle U Roy kupar Synrem.
Ka HYC ka kyntu ia ka District Council ba ka dei ban shim ia ka rai ban leh eiei halor ka jingleh be-ain jong ka Saumya Company bad ban leh ruh da kaba tyngeh ia ka Lafarge ba ka la shah ban treikam khlem ki kot ki sla kiba biang bad ka la kyntu ruh ia ka Council ban leit khynra ia ki kot ki sla ki nongtrei bar jylla kiba trei ha ka thaian Shella.