300ngut, kiba shah pynpra dukan ha Polo, ki hap shong iing

Shillong, 1 Naitung:
Bun ki trai dukan ki ba la shah pynpra ia ki dukan jong ki, ki la hap ban shu shong iing namar ba kim don jaka shuh ban shong. Hynrei don tang kato katne ngut kiba ioh jaka na ka sorkar ban shong die dukan.
Haba iakren bad u Secretary ka seng Greater Iew Polo Association (GIPA) u Bah Pynsuklang Hynniewta u la iathuh ba ki dukan kiba shah pynpra ki don kumba 300 tam. Kitei ki trai dukan kiba la shah pynpra, ha katei ka tnad jong ka Municipal, bun na ki mynta ki la shu shong iing.
“Bun na kiba shah pynpra iing ki la hap ban shong iing noh namar ba kim don jaka shuh ban shong ban die jingdie”, la ong u Bah Hynniewta.
U Bah Hynniewta u ong ruh ba ka sorkar ka la kular ia ki ba kan ai jaka biang ia ki ban buh dukan, ynda la dep shna ia ka Shopping Complex ba thymmai ban pyndep hapoh 24 bnai ne ar snem.
U la ong ba ha ki por mynshwa ki siew bai wai dukan sha ka Municipal ha ka dor T.5 Sq ft shi bnai.
Lah ban kdew ba ka tnad jong ka Municipal ha kane ka sngi Saitjain ba ladep ka la pynpra lut plain ia ki dukan ha iew Polo. Kane ka long hadien ba ka Kashari ka la pynmih ia ka hukum ha u Iaiong, .
U Chief Executive Officer (CEO) ka SMB u Bah E Kharmalki u la ong ba kim shym la leh wut wut, ban pynpra ia ki dukan ha katei ka iew, namar ba don ki kyndon ba ka Kashari ka la ai por ia kiba shah ktah ban ujor lada ki kwah.
Katkum ka jingbthah ka Kashari, u bah Kharmalki u la iathuh ba ka tnad SMB kan ai shipor ia ki trai kudam ban kynriah ia ki tiar sha kiwei ki kudam.
Ka Myntri sor ka Kong Ampareen Lyngdoh ka la ong ba ka dei ka jingleh kaba khraw ba ka sorkar ka la jop ia ka mukotduma.
“Hapdeng ki jingeh ba la wan hapdeng lynti ban pynthut ia ka jingthmu ka sorkar ban pyntreikam ia ka projek thymmai ha kane ka iew, mynta ngi la lah ban sdang ia ka jingtei ia ka iew thymmai ha Polo”, la ong ka Kong Lyngdoh.
Kham mynshwa, u trai ka Hotel Polo Towers, u Raj Kumar Sharma lem bad 24 ngut nongkhhaii bar jylla ki la ujor sha ka Kashari, kaba la pynthut ia ka jingshna ia ka iew.
Kitei ki nongkhaii bar jylla ki la ujor hadien ba ka sorkar ka la pan jingshai ba kin pynkynriah noh ia ki kudam na katei ka iew.
Ka sorkar ka la mang T. 21.41 klur ban shna ia kane ka iew thymmai ha Polo bad yn pyndep hapoh ar snem. Ka sorkar ka la aiti ha ka Naitonal Building Construction Corporation (NBCC) ba kan trei ia katei ka kam.