3000 ngut ki dkhot na 350 Unit, sha ka elekshon KSU

Shillong, 12 Rymphang:
Ha ka sngi saitjaiñ jong ka taiew ka KSU ka la pynlong ia ka elekshon nongkitkam thymmai jong ka na ka bynta ka samoi treikam 2017 haduh 2020.Ha katei ka elekshon u samla Lambokstarwell Marngar u la jop suk ia ka kam President naba ym don nongiakhun pyrshah ia u, u samla Shemphang Lyngdoh Mawphlang u la jop suk ia ka kam Vice President bad u samla Donald V Thabah u la jop suk ia ka kam General Secretary naba ym shym la don kiwei pat ki dkhot kiba ia khun pyrshah. Ka elekshon ka la long ha Dinam Hall, Jaiaw-Shillong. Hadien ba la pynbna ia ka resol elekshon u President ba thymmai jong ka KSU u samla Lambok u la ong ba ka KSU haduh mynta kan dang ieng ha ki nongrim ba ka ju ieng baroh shi katta kata ban dawa ia ka ILP, ban pyrshah Uranium bad ban pyrshah lynti rel katba ka sorkar kam pat lah ba nwanrah ia ka ain kaba khlain ban iada ia ka jingwan rung kyrthep ki mynder sha kane ka jylla.
Ha kaba ia dei bad ka ILP u la ong ba ka jingiakhih ka la sdang naduh u snem 2013 hynrei namarba ka sorkar ka la kren shai ba kam lah ban pyntreikam, la ai jingmut noh ba kan pyntreikam da ka ain kaba khlain ban iada ia ka jingwan tuid ki mynder sha kane ka jylla hynrei u la ong ba ka KSU kam pat sangeh ia ka jingdawa ia ka ILP.Halor kitei ki ain ba ia kren bad ka sorkar kata ban pyndep noh ia ka jaka rung jaka mih ki briew ba nabar shuwa ba nrung ha kane ka jylla u samla Lambok u la ong “Lada ka sorkar kan dang iai pynslem , ngin hap ban pyrkhat sa da kumwei pat” ong u samla Lambok. Ki la don haduh kumba 3000 ngut eiei ki dkhot ka KSU na kylleng ki jaka kiba la wan ban ia shim bynta ha katei ka elekshon na ki 350 tylli ki Unit ba kynthup naduh Assam bad Manipur ruh. Kiwei pat ki nongialam katei ka seng kiba la sha jied mynta ka sngi ki long u Sonstar Nongkhlaw kum u Assistant General Secretary, Biangbor Paliar Organising Secretary, Rapbor Nongrum Publicity secretary bad u Spaindorsing Lyngkhoi kum u Office Secretary. Haba kren ha katei ka sngi u samla Daniel Khyriem President barim u la ong ba ka la de ika por ia ki nongialam bad ki dkhot jong ka KSU ban pynkhreh ban ia khun nan bynta ka ri bad ka jaitbynriew. Ia kitei baroh ki nongialam yn pynbam smai ha ki tarik kaba ka GEC kan sa shim rai shen.