30 tarik yn rah lama iong ki paidbah Sohra ba khang tih dewiong

Sohra, 20 Jymmang:
Kum ka dak ka jing pyrshah ia ka jingkhang tih dewiong ka National Green Tribunal (NGT) ha baroh kawei ka jylla, mynta ka sngi ki Khlieh Nongsynshar Shnong ka thain Sohra ba kynthup ia u Syiem, Sordar, Rangbah Shnong, ki sengbhalang, ki trai par bad nongkhaii dewiong, ki nongbylla dewiong bad kumjuh ruh ki trai bad ki nongniah kali kit dewiong kiba la kot da ki hajar ngut ki la tuid sha ka jingialang kaba u MLA ka Sohra u bah Titos Chyne u la lum ha Ing Dorbar ka dong Khlieh shnong, Sohra.
Ha katei ka jingia lang la thaw ia kawei ka Joint Action Committee (JAC) ban pyrshah ia katei ka

hukum ka NGT. Ia katei ka JAC la khlieh da u Syiem ka Hima Sohra u Pa ‘iem Freeman Syiem kum u chairman katba ia u Secretary pat la thung ia u bah Khrawbok Basaiawmoit , u Executive Member ka hima Sohra. Kiwei pat ki dkhot ka JAC ki long u President bad Secretary jong ka Sohra Coal Supplier, ka seng ki nongkhaii dewiong , ki rangbah shnong, ki sordar , ki sengbhalang bad kiwei pat kiba la mih khmat na ki trai par bad nongbylla dewiong. Katei ka jingialang ka la rai ruh ban pynlong da ka jingialang paidbah ha ka 30 tarik mynta u bnai ha ka por 11 baje mynstep ha Laitryngew, bad ha katei ka jingialang paidbah kan don ka jingrah lama iong kum ka dak ka jingpyrshah jur ia ka rai ka NGT kaba la ktah ia ka ioh ka kot bad ka kamai ka kajih ki paidbah ka thain Sohra.
Katei ka jingialang, ka la pynpaw ruh ka jingkyrshan ia ki Seng ba ia khih pyrshah halor ka rai jong ka NGT, bad ha ka juh ka por ka la kyntu ia ka sorkar ba kan shimkhia halor katei ka phang. Ka jingialang ka la rai ruh ban phah ia ki nongmihkhmat na ka JAC ban leit ia kynduh ia u Myntri Rangbah ka jylla, uba kin sa leit ia kynduh shen ha kine ki sngi bad ban ia kren bad u halor katei ka phang bad kumjuh ruh ban ai ia ka mat jingdawa jong ki.
Hadien ba la wai katei ka jingialang, na ka liang u bah Titos Chyne MLA bad kumjuh ruh u Syiem ka hima Sohra ki la pynpaw ka jingpyrshah jur halor katei ka rai ha kaba ki la ong ba ka jingkhang tih dewiong ka dei kaba ktah jur ia ka ioh ka kot ki paidbah ka thain bad khamtam ia ka Karkhana pynmih dewbilat ka MCCL bad ka jingthang mawshun, “Lada khang dewiong, ka MCCL ruh kan khang bad kumjuh ruh ka jingtih mawshun bad katei kan ktah ia baroh ki paidbah ka thain Sohra” ong u Titos Chyne uba la pynpaw ba ka jingtih dewiong ha Sohra ka dei ban ai sha ka MCCL, hynrei lada khang dewiong ka MCCL kaba long ka pliang ja ki nong Sohra ruh kan khang bad kane kan pynlong ruh ia ka MCCL ban ym ai tulop shuh ia ki nongtrei jong ka , bad ka jingkordit bad ka jingjynjar kan wan ha thain Sohra.
U Pa’iem Freeman Syiem u la pynrem jur halor ka jingkhynra bad ka jingkem kem ia ki briew kiba tih bad pyniaid dewiong ha Sohra , bad u la ong ba kane ka jingleh jong ki ka dei ka jingleh donbor namarba kam shym la don kano kano ka jingkynjoh ktien ia ki Khlieh nongsynshar hapoh ki thain Sohra. U la pynkynmaw ba ka kam tih dewiong ha Laitryngew ka dei ka kam kaba la sdang naduh shispah snem mynshuwa.
Haba la kylli na u Pa’iem hato kam shym la don seh kano kano ka jingpyntip sha ki bor synshar ka hima, u Pa’iem u la ong ba u shu ioh Kopi na u SDO ( Civil) Sohra katba kam don pat kano kano ka jingbthah ban pyntip sha ki Rangbah Shnong, “Ki la dei ban ai jingtip sha baroh ki rangbah shnong ba la khang ban tih dewiong” pynkut u Syiem ka Hima Sohra. Lah ban kdew ba ia katei ka jingialang kaba la long mynta ka sngi ha Khlieh Shnong, Sohra la lum bad pyniaid da u MLA jong ka u bah Titos Chyne.