30 tarik u Risaw ka Proseshon bah ki Rangbah Shnong

Shillong, 1 Risaw:
Ka Synjuk ki Nongsynshar Shnong ka Bri u Hynniewtrep ka la pynbna ba kan pynlong da ka jingiaid proseshon bah ha ka 30 tarik u risaw, 2015.
Ia katei ka rai ka kyrwoh na u General Secretary jong ka, u bah RL Blah u la ong ba la shim ha ka jingialang ka Synjuk kaba la long mynta ka sngi.
Shuwa katei ka sngi katei ka synjuk ka la pynbeit ba kan don ka jingialang ha ki District bapher bapher ban ia wer bad ban pynshai ba ki paidbah kin mih ha ka 30 tarik u risaw. Ka la kyntu ruh ia baroh ki Dorbar shnong bapher bapher ba kin mih paidbah ban ia shim bynta shitrhem ha katei ka proseshon bah ka ban long ha ka 30 tarik.
Ha ka kyrwoh ka Synjuk Ki Rangbah Shnong ki la pynrem jur ruh ia ka sorkar jylla hapoh ka jingialam u myntri rangbah u Dr.Mukul Sangma ban wanrah ia ki Aiñ ki kyndon bapher bapher kaba la mushlia ia ka rit ka dustur bad ka la dawa ia u myntri rangbah bad ki myntri sorkar ba ki dei ban hiar shuki noh haba kim lah ban wanrah ia ka jingsynshar bad ka jingbit jingbiang u paidbah.
Ki Rangbah Shnong ki la dawa ruh ba ki dei ban ioh noh ia ki Bill ba la pynkhreh da ka KHADC bad JHADC kaba iadei bad ka jingithuh bad jing pynkup bor ia ki Dorbar Shnong.  Ka pyrshah jur ia ka Sorkar Jylla ban wanrah ia kino kino ki Bill ba thymmai kiba ia dei bad ki Dorbar Shnong bad ia kino kino ki Bill kiba ktah ia ka riti dustur, u duk u suk  bad ia ka lawei ki samla samhoi kiba long ki nong mih pli ban kit ban bah ia ka bha ka miat jong ka jaidbynriew.