30 snem ai wai ka sorkar sha ka UCIL ia ka Mawthabah-Wahkaji

Shillong, 11 Naitung:
U President ka UDP u Dr Donkupar Roy u la takrain ia ka sorkar jylla kaba la ai wai haduh 30 snem ia ka jaka sha ka Uranium Corporation of India (UCIL) ha ka thain Wahkaji-Mawthabah. Katkum ka jingong jongu, kane ka dei ka lynti kaba bakla ba ka sorkar ka la leh.
U la ong ba ka UDP kan ieng beit ha ka nongrim ba ka jingtih uranium kan urlong haduh bad lymda ka UCIl ka pynthikna ba kan nym don ka jingktah ia ka jingkhoit jingkhiah jong ki paidbah.
“Katba ym pat thikna ba u Uranium um don jingktah ia ka jingkoit jingkhiah ki paidbah, ka UDP ka ieng beit ha ka nongrim ban ong ‘em’ ia ka jingtih uranium”, la ong u Dr Donkupar haba kren hynne ka sngi sha ki nongthoh khubor.
U la ong ba ha ka jingshisha, ka sorkar kam dei ban ai wai ia ki jaka sha ka UCIL katba kam pat lah ban pynthikna ia ka jingkoit jingkhiah kaban ktah ia u paidbah na ka jingtih uranium ha kane ka jylla.
Haba kynthah ia ka sorkar jylla, u Dr Donkupar ula ong, “Ka sorkar India kam lah ban tih ia u uranium ha kane ka jylla haba ka sorkar jylla ka ong em namar ba kane ka dei ka jaka jong ka sorkar jylla”.
Katba u Bah Shylla uba la ju iakren bha ia kane ka mat ha ka por ba u long CEM ka KHADC mynshwa, u la ong ba ka jingtih ia uranium kan shong ha ka sorkar India hynrei kam dei ban tih haba kam pat don ka jingpynshai ka jingpynsngewthuh paidbah halor ka jingbha ne ka jingsniew.
U la ong ba ha ka por ba u long CEM ka KHADC, u la iasaid ban pynshna ia ka surok kaba la bei pisa ka UCIL T. 20 klur, ym ban ialap ban tih uranium.
“Ngi la ia rai ha ka EC ban shah ban shna surok sha Mawthabah-Wahkaji namar ba ngi sngew ba lada ngim shah ban shna surok, kan long kumba ngi la leh bein ia ki briew jong katei ka thain”, la ong u Bah Shylla.
Lah ban kdew ba dang shen, u Myntri Rangbah ka jylla u Dr Mukul Sangma u la ong ba ka sorkar jylla kan nym kit khlieh lada ka UCIL kan tih ia u uranium. U la ong ba ka jingkhot tender ka UCIL ban buh ban shna ia ki tum ki tam ha Mawthabah-Wahkaji ka dei kaba leh hi khlem ka jingtip bad ka jingkynjoh ktien ia ka sorkar jylla.