3 tylli ki mat, la seng ia ka FKJGP

Shillong,11 iaiong:
Ka FKJGP, ka sengbhalang kaba la suh thied sha jan manla ki jaka ha kylleng ka Ri-Khasi Jaintia mynta ka la don hapdeng ka jing iaid lynti kaba 25 snem, dang shen la rakhe ia ka jingdap 25 snem jong ka hangne ha nongbah Shillong. U bah Titos Chyne, MLA ka Sohra uba la long teng ruh u nongialam katei ka seng uba la bat teng ia ka kam President jong ka East Khasi Hills u la pynkynmaw ba ha ka por ba la seng ia ka FKJGP ki mat ba kongsan eh ba la bun ha khmat ka dei ka kam khappud, ka io kam ioh jam ki samla bad ka jingwan rung kyrthep ki mynder sha kane ka jylla. “Ka Border issue, ka ioh kam ioh jam bad ka Influx-ki dei ki mat ba ngi la buh ha khmat ha ka por ba la seng ia ka FKJGP” ong u bah Titos haba ai jingkren ha ka sngi pynhap pyrda ia ka Inter School ka FKJGP kaba la long ha Laitlyngkot.
Hapdeng ki jingiaid lynti kaba 25 snem, u bah Titos u la kitbok kit rwiang ia ka seng FKJGP bada ia ki nongialam jong ka ba kin nang kiew shaprang ha ki kam jong ki bad ba kin trei shitom na bynta ka Ri bad ka Jaitbynriew. U la ai khublei kyrpang ruh ia ki ar ngut ki nongialam ka FKJGP kiba la wan poi sha Laitlyngkot ka Konstitwensi kaba hap hapoh ka jingpeit jong u, ha kaba u la kitbok ia kitei ki ar ngut ki nongialam ka seng u bah Eldie Lyngdoh bad u bah Regional Thabah kiba dang shu mih shen na phatok bad kiba la shah kem namar ka jingiakhih ILP.