3 trok kurup rnga “tuh”, ka tnat khlaw na Seinduli

Nongstoin, 28 Jylliew:
Mynta ka sngi, ki briew jong ka tnat Khlaw, na Nongbah Shillong, ki la wan hiar kynsan kynsan sha ki bynta jong ka West Khasi Hills District, na ka bynta ban pynlong ia ka jingkhynra ia kiba bun ki jaka thang rnga beain ha katei ka thain.
Katei ka jingwan hiar kynsan jong kitei ki ophisar ka tnad Forest ka long hadien ka jingiohi ka jong ki lyngba ki kotkhu bor halor ka jinglehmon bad iaid laitlan ki nong khaii rnga beain ha kiba bun ki bynta jong ka West Khasi Hills, bad lyngba katei kala pynkhih khoh reh ia katei ka tnad ba kin wan ban pynlong ia katei ka jingkhynra kaba kynsan kynsan.
Ia katei ka jing khynra la sakhi ruh da ki nongthoh khubor mynta ka sngi ha kawei na ki jaka jong ka shnong Seinduli West Khasi Hills District, ha kaba la lap ruh ba katei ka tnad Forest ka la lum bad khat noh ia kiba bun bah ki rnga kiba la pynlang ha ki jaka lum, bad la kurup noh haduh lai trok ki rnga tang na ki ar tylli ki jaka pynlang.
Haba iakren bad ki nongthoh khubor na ka liang jong u bah L. Shangpliang u ba dei u Protection Ranger jong katei ka tnad u la ong ba ka jingwan jong ki ban pynlong ia katei ka jingkhynra kalong halor ka jingioh ia ka hukum na ki heh ophisar jong katei ka tnad ban wan pynsngewthuh ia ki briew ba kim dei ban thang ia u rnga namar ka ktah bad pynjot ia ka mariang. Shuh shuh u la ong ruh ha kaba iadei bad u tei u rnga, ba ki la ioh ban kurup bad kem na ka liang jong ki kin hap ban rah bad kit noh sha Mawiong Shillong, ha kaba na ka liang jong ka tnad kan sa leh ia kiba donkam, bad u la ong ruh ba lada ki bor ba halor ki hukum bad ai bor, kin dang hap ban bteng ban pynlong ia ki jingkhynra sa sha kiwei pat ki bynta jong ka West Khasi Hills. “Ngi ju pynlong ia kiba kum kine ki jingkhynra na kapor sha kapor hynrei ka shem shitom ia ngi ba ngin tehlakam kum ia kine kiei kiei namar ba ia ka West Khasi Hills haduh mynta ka dang hap hapoh ka jingpeit jong ka Tnad Forest na ka Nongbah Shillong” ong u bah Shangpliang.
Ha katei ka jingwan khynra la iadon ryngkat lang ruh u bah T.K.K. Marbaniang Ranger North Range jong katei ka tnad, u bah S. Pyngrope Forester North Range bad kiwei kiwei ki ophisar bad ranger jong katei ka tnad Forest.