3 Trok heh yn pynmang khaw u Dasakhiatbha Lamare sha ki longiing baduk ka Mawhati Constituency

Nongpoh: Wat hapdeng shibun ki jingshah kynthoh ba u Dasakhiatbha Lamare, uba dei ruh u MLA ka Mawhati Constituency, ba um shem la shimkhia halor ka jingeh ki paidbah hapoh ka Constituency, hynrei kaei kaba u la leh hynnin ka sngi utei u MLA na Mawhati, u la lum ia ki nongialam shnong na ka bynta ban iakren halor ka jingeh jong ki longiing baduk bad ruh uba la pyllait paidbah syndon ia u khaw uba la kit shi Trok heh, na ka bynta ban sam ia ki paidbah jong katei ka Constituency.

Nalor u MLA, kiba la don ha katei ka jingialang ki kynthup ia u MDC ka Umroi, u Bah R.R Kharbuki, ki nongialam shnong ka Mawhati, kumta haba kren ha katei ka jingialang, utei u Nongmihkhmat ka Mawhati, u la ong ba u duh thiah duh dem ban pyrkhat ia ka jingeh jong kiba duk bad khamtam lei ha kaba kum kane ka por, kaba ki paidbah bad kito ki longiing baduk ki iakynduh.

Ha katei ka jingiapynbeit ban sam khaw ia ki Longiing baduk, utei u MLA ka Mawhati, u la rah ruh ia shi trok heh u Khaw bad uba la don kumba 25 Ton ei ei, hynrei nalor kata u la ong ruh ba u dang trei shitom pat ban pynioh sa shibun u Khaw, ia kaba u la pynmang haduh 80 Ton ei ei, khnang ba kan long ka jingiarap na bynta jong kito ki longiing kiba iakynduh jingeh shisha ban ioh ia ki mar bam bad khamtam eh ia u Khaw.

Ha ka jingiatai na ka bynta ban sam ia u Khaw u ban sa poi sha Mawhati Constituency, utei u MLA ka Mawhati, u la kyntu ia kitei ki nongialam shnong ba kim dei ban leh shilliang iano iano ne ban wanrah ia ka jingsngew Politik, hynrei ki dei ban sam hok ia kito kiba longiing kiba duk khlem da niew shilliang kham.

Nalorkata, u la kyntu ruh ia ki paidbah ba ki dei ban long kiba iai shah, namar kum u nongmihkhmat um shem la shongthait, hynrei u la trei shitom na ka bynta ban leh ia kaba bha tam ia ki paidbah hapoh ka Constituency bad khamtam eh ia kito ki longiing kiba duk bad kiba shem jingeh ha kaba kum kane ka por.

Ha kawei pat ka liang, utei u MLA ka Mawhati, u la kyntu ia ki riew rangbah lem bad ia ki paidbah ba kim dei ban shim kabu ne ban wanrah ia ka jingiasngew pher jingmut ha kiba kum kane ka por, kaba dei ruh ka por kaba baroh ki nongshong shnong hapoh ka jylla bad ri ki iakynduh jingeh.