Shillong, 16’lyngkot:
Ha ka dorbar ka KHADC kaba la long ha u risaw, 2016 u CEM bah Pynshngaiñ N Syiem u la kular ha ing dorbar, haba jubab ia ka jingdawa jong u MDC ka KHNAM na Jaiaw u bah Adelbert Nongrum ba un leh eiei ban pyni kumno ban pynbeit thymmai ia ka Rules 128 jong ka A.D Rules kaba la ailad ia ki bym dei ki riewlum ban ia shim bynta lane ban thep vote ne ia khun elekshon ha ka elekshon District Council.
Ka ar bnai ki jingkular u CEM, bad la iathuh ba na ka por sha ka por ka la don ka jingpynbor bad ka jingiai pynkynmaw na ka Party KHNAM ia u CEM bad ban pynkyrkieh ruh halor katei ka bynta kumba u la dep kular. Khadduh u CEM u la sdang ban leh eiei ia katei ka kam ha kaba mynta ka sngi u la sam shithi sha baroh ki EM bad ki MDC jong ka KHADC ba kan don ka jingialang jong ki lai District Council lane ki 3 ngut ki CEM jong ki district Council kata ka KHADC, JHADC bad ka GHADC ban ia kren halor katei ka bynta bad ia ka jingialang la buh por 11 baje mynstep ha Conference Room ka KHADC.
Hynrei shuwa ia kane u bah Pynshngaiñ haba ia kren bad ki nongthohkhubor u la ong ba u la khot jingialang ia baroh ki nongialam Party ha KHADC (PP Leaders) ha ka 27 tarik mynta u bnai ban pyrkhat ia katei ka kam bad ha katei ka jingialang kin sa shim ia ka rai kumno ban ia kren hapdeng ha katei ka jingialang ka ban long ha ka 3 tarik u rymphang.
Phi don ban ong eiei?