Shillong: Ka ophis treikam ka Deputy Commissioner (DC) ka East Khasi Hills (EKH) mynta ka sngi la pynbna ba ki dukan sam bad die marbam kiba la ithuh da ka sorkar kin plie biang lashai ka sngi kata ha ka 3 tarik iaiong 2020 hapoh ka nongbah Shillong bad ha ki jaka ba markhap.
Ki dukan naduh ki ba die khaw, shini, jhur, soh bad ki dukan die doh bad kiwei kiwei de ki marbam ki lah ban plie ha ki jaka ba la ithuh da ka sorkar.
Haba dei bad sha ki thain kyndong, na ka liang ki ophisar jong ki block bapher bapher ki la pynkhreh ia ki jaka na ka bynta ban ia die marbam sha ki paidbah.
Na ka liang ka ophis DC ka la pyntip ba ki nong synshar shnong naduh ki rangbah shnong bad ki secretary shnong ki dei ban ia treilang bad ki bor district na ka bynta ban khanglad ia ka jing lum paidbah ha khmat ki dukan sam bad die marbam.
Kum shi bynta ban khanglad ia ka jing ia tur paidbah sha ki dukan na ka liang ka oiphis treikam ka DC ka la btah ba ki nong wan thied marbam ki dei ban ieng ha ki jaka ba la draw ha khmat ki dukan.
Na ka liang ka DC ka EKH ka la kyntu ia ki paidbah ba kim dei ban khuslai ban thied shibun namar ba ka jing don marbam hapoh ka jylla ka dang pahuh.
Phi don ban ong eiei?