Shillong: Ka lumpung ialehkai basketball kaba ai kyrteng ka ‘North East 3×3 Challenge and Sports Carnival” kaban pynlong da ka Touchline North East ban kyrshan ka Meghalaya AIDS Control Society kan long lai sngi ha ka 10 haduh 12 tarik Nohprah 2018 ha madan Iewrynghep, Laitumkhrah Shillong.
Ha kane ka lumpung kin don ruh ki kynhun na jylla Assam, Nagaland bad na Bhutan kiban wan iashim bynta nalor ki kynhun na kane ka jylla.
Haba kren mynta ka sngi sha ki lad Pathai khubor mynta ka sngi, u nongpyniaid ka Touchline NorthEast, u bah Andrew Suting u la iathuh ba ha kane ka tamasa ialehkai kaba lai sngi, yn don kumba 60 tylli ki kynhun ialehkai ha kaba kawei ka kynhun kan don saw ngut ki nongialehkai bad lai ngut ban don ha madan bad yn pynialehkai 10 minit kawei ka jingialehkai.
U la ong ba ka jingialehkai kan long ruh ia ki kynthei bad shynrang kynthup ia ki rangbah bad kiba dang khynnah ka rta.
Ka khusnam ia ka lahduh jong ka kynhun ki rangbah shynrang kan long T.25 hajar, katba ia ki kynthei kan long T. 10 hajar katba T.7 hajar ia ki khynnah kynthup ia ki shynrang bad kynthei.
U Bah Andrew u la ong ba nalor ka jingialehkai basketball, kan don ruh ka jingshad, ka jingrwai bad kiwei ki kam ban pynsngew tynnad ia ki paidbah.
La iathuh ba ka daw ba ka Meghalaya AIDS Control Society ka kyrshan ia kane ka lumpung ka long namar ba kiba bun ki samla kin dei kiba dang samla bad kiba dang khynnah ka rta hapoh 18 snem, bad kum kane ka donkam ban pynsaphriang ia ka khubor khnang ba kin lait na ka jingma jong kane ka jingpang.
Ha kawei ka liang, u coach ka basketball u Sanju Das u la iathuh ba ka jingialehkai basketball ha kane ka jylla ka la sdang kiew ha kine ki lai snem hadien ba la don ki coach ba kham biang. U la ong ba hadien ka lumpung bah ka national games, khlem pep ka jylla kan sa lah ban sei ia ki nongialehkai kiba la bit ban iakhun ha ka lumpung bah ka ri.
U la iathuh ba ka Touchline ka la don kumba 70 ngut ki khynnah kiba ka la ai jinghikai bad kyrmen ba na kine, kin sa mih kiba tbit ym tang ha ka basketball hynrei ha ka phutbol bad kiwei ki jingialehkai.
U la ong ba lada ki nongialehkai na Mizoram ki lah ban poi shaduh ka national level, kam don jingeh ia ka Meghalaya ruh ba kan leh lem.