Shillong: Ki nongialam ka North Eastern Hills University Students Union (NEHUSU) myn hynnin ka sngi kila leit ban kynduh ia u Control of Examination ba u dei ban pynbeit hapoh lai sngi ia ka jingioh mark ki samla pule kaba la wanrah ia ka jingshaiong ia ki.
Ha kaba kren sha ki lad pathai khubor, u General Secretary ka seng u samla Iarapbhathik Shangrit u la ong ba ka jingioh mark kaba tang 01, 03 jong ki samla pule kiba ia ka eksamin NEHU,ka la pynlyngngoh ia ki samla pule namar ba ha ka 1st bad 2nd semester ki ioh 70 percent hynrei ha kane ka 3rd semester ki ioh tang katne ki mark.
“Ngi la ai jingthoh ban bishar ia kane bad ngi la ai por lai sngi ia u Controlller of Examination bad lada kim leh eiei, ngin shim da kiwei ki sienjam”, la ong u samla iarapbhathik.
U la iathuh ba u Controller of Examination u la kular ban khot jingialang ban iakren ia kane ka kam.
“Ha ka jingpeit jong ngi, ngi la iakren ngi la ioh peit ia ki mark jong ki samla pule bad ngi la iohi ba kiba ioh 64-70 percent ha ki 1st bad 2nd semester, mynta kila ioh tang 01, 02 bad kane ka la pynlyngngoh ia ngi”, la ong u general secretary ka NEHUSU.
U la bynrap, “Ngin leit kynduh biang ia u hadien kane ka 3 sngi bad lada um leh eiei, ngin sa shim da kiwei ki lad namar ba kim lah ban shu lehkai ia ka jingim jong ki samla pule”.
Phi don ban ong eiei?