3 ngut, yn iaknieh kam Sordar ka Raid Mawshun

Shillong, 10 Naitung:
Lai ngut ki rangbah kin iaknieh ia ka kam sordar ka Raid Mawshun kaba hap ha ka thain Riwar Pynursla. Kine ki lai ngut kiba la pynskhem ban iakhun ki long u Bah Joy Tariang uba iakhun na ka shap Ksing uba dei na shnong Lapalang, u Bah Lamiki Khongdkhar na shnong Mawshun uba iakhun na ka shap Mawbynna bad u bah Dapkupar Tariang uba na Nongthymmai uba iakhun na ka shap Wait.
Ka elekshon jied sordar jong kane ka raid kan long ha ka 15 tarik ha kaba ki don 1950 ngut ki nongjied kiba dei tang ki shynrang jong kane ka Raid.
U Chairman ka election u Bah Hilarius Pyngrope haba kren bad u Rupang u la iathuh ba ia kane ka elekshon la pyniaid hi da ka Saw Raid, katkum ka ain ba la thaw da ka District Council bad yn shu phah ia ki jingtip sha ka Council, bad kiwei ki bor.
Ki don saw tylli ki jaka thep kynthup ha Nongthymmai, Lapalang, Pomshutia bad Mawshun. Ia ka jingioh vote jong ki kyrtong ruh yn niew noh ha kato ka sngi hi bad yn pynbna ha Pomshutia, la ong u Bah Pyngrope.