3 ngut, iaknieh tiket Congress na Shella, mynta yn rai ia ki kyrteng

Shillong: Napdeng kiwei ki party, imat kiba bun ki nongpan tiket ka dei na ka Congress na ka bynta ka elekshon shiteng samoi ha Shella.

Katkum ka khubor na ka Congress, ki don lai ngut kiba iaknieh tiket kiba kynthup ia ka MDC ka Nongshken ka Kong Grace M Kharpuri, u President ka Shella Block Congress bah Bantynsain Ryngnga bad u IAS ba la shongthait u bah W Khyllep.

Ka Election Commission of India ka la pynbna ba ka jingjied ia u MLA thymmai ka Shella konstitwensi kan long ha ka 21 tarik u Risaw ban bad ka jingpynbna kan long ha ka 24 tarik ujuh u bnai.

U working president ka Meghalaya Pradesh Congress Committee (MPCC) u bah James Lyngdoh u la iathuh ba ka Pradesh Election Committee (PEC) jong ka seng Congress kan iakynduh lashai ka 24 tarik por 7 baje janmiet ban iathir iano ban phah ia ka kyrteng ki 3 ngut sha ka AICC ban ai ia ka jingmynjur ban long kum u kyrtong ban iakhun iaka elekhson shiteng samoi na Shella.
Ki dkhot ka PEC ki kynthup ia u President ka MPCC u Dr Clestine Lyngdoh, u nongialam ka Liang Pyrshah u Dr Mukul Sangma, u Bah Ronnie V Lyngdoh, u Bah Kenedy Khyriem bad kiwei kiwei.
“Kane ka jingialang kan bishar bad jied ia u kyrtong bad kan sa phah sha ka All India Congress Committee ban ai iaka jingmynjur” la ong u Working President ka MPCC.
Kumba ka long mynta, ki nongialam ka seng Congress kim lah ban rai iano ban ai tiket namar ba baroh 3 ngut ki dei kiba bit suda.
Lah ban kdew ba u Bah Wilfred Khyllep ha kine ki khyndiat taiew, ula resain noh na ka kam kum u Officer on Special Duty (OSD) ka KHADC hadien ba u la paw kyrteng kum uwei na ki nongiaknieh tiket ha kane ka elekshon.
Ka Election Commission of India kala pynbna ban pynlong iaka elekshon ha Shella ha ka 21 tarik u Risaw hadien ka jingkhlad noh u MLA ka Shella u Dr Donkupar Roy ha ka 28 tarik u Naitung mynta u snem.