Jowai: Ka AMPSTA ha ka Executive kaba la long ha Khliehriat, ka la rai ban ai por ia ka sorkar jylla 3 bnai ban pynskhem ia baroh ki nonghikai kiba Primary School bad kumjuh ia kito ki nonghikai ha ki Deficit School ki bym pat shym la regularize da ka tnad Education jong ka jylla.
U Ma Kyrmen Shylla, myntri ka sorkar Jylla, haba kren ha ka jingialang ka AMPSTA, ha ka Sngi Saitjain ha Khliehriat:Rupang
Ha kane ka sngi Saitjain ba la dep, ki Nonghikai Primary School hapoh ka Lama jong ka All Meghalaya Primary School Teachers’ Association (AMPSTA) ki la pynlong ia ka Beinnial Conference ka ba 7th ha Good Shepherd Secondary School, Ladrymbai ha kaba u myntri ka tnad Revenue bad Disaster Management etc, u ma Kyrmen Shylla u la long u kongsan ha ka jingiadon ryngkat u ka kong P. Dkhar kaba dei ka SDSEO bad ruh u Superintendent of Police ka East Jaintia Hills, Vivekananda Singh Rathore.
Ha ba kren ha kane ka Conference ki Nonghikai, u bah FC Shullai u la ong ba ka sorkar jylla ka dei ban ithuh noh lane pynskhem ia baroh kito ki nonghikai ki bym pat ioh regularization.
U bah Shullai u la ong ruh ba ki don ki Nonghikai jong ki Deficit School ki bym pat regularized bad kane ka la jia hangne ha Khliehriat. Ha ka jingshisha, ka bor ban leh ia kane ka shong tang ha ka District School Education Officer.
U bah Shullai u la kynthoh tyngeh ruh halor ka jingshah kynnoh ‘Tainted’ ki nonghikai ha kaba u la ong ba katkum ka CBI report kaba nyngkong kam shym don kita ki ‘Tainted’ katba kane ka paw tang ha ka CBI report kaba ar, kaba la dep submit sha u Chief Secretary ka jylla.
Kawei pat ka jingdawa ki nonghikai ka long ban pynioh tikna ia ka tulop jong ki nonghikai. “Ngi ki nonghikai ngim ju ioh tulop tikna bad ngam tip na kaei kadaw ba wat ha ia ka Sanction kaba na ka bynta u bnai March April bad May ruh ym shym pat ioh haduh mynta.
“Lada ngim ioh tulop kaba tikna ban pynbiang ia ka iing ka sem jong ngi, kumno kin khmihlynti ba ngi lah ban ai ka jinghikai kaba janai sha ki khynnah skul”, la ong u bah Shullai.
Ka CPF ruh kam pat treikam pura bad u la kyntu ia ka sorkar bad ia ka tnad ba dei peit ia ka pule dangle ba kin pyntreikam pura ia ka CPF bad ha ka juh ka por ban pyntreikam ia ki scheme shongthait lane ka Retirement Benefits.
“Dei ha u snem 2003 ba ngi la ujor sha ka iing bishar High Court bad hadien 10 snem, ka iing bishar ka la pynmih ia ka hukum ba ka sorkar kadei ban pyntreikam ia ka Retirement benefits sha ki nonghikai.
U MLA ka thain bad uba dei ruh u myntri sorkar, u ma Kyrmen Shylla haba kren u la kyntu ia ki nonghikai ba kin ai ia ka jingiatreilang bad kane ka sorkar hapoh ka jingialam u Conrad Sangma khnang ban pynurlong ia baroh ki jingdawa bad ban weng ia ki jingeh jong ki nonghikai.
“Ki nonghikai ki dei ki nongsain dur ia ka lawei bad kum ka sorkar ngi don ka jingkitkhlieh kaba khraw ha kaba iadei bad kino kino ki jingeh jong ki nonghikai”, la ong u ma Shylla.
Phi don ban ong eiei?