Mawrynkneng : Ka jingialehkai Top Four kaba dei ka Elimination Round jong ka 10th Mawryngkneng Greater Football League 2018-19 hapdeng ka Mission SC pyrshah ia ka Nondawah SC ka la long shisha kaba pynhun ia u paidbah nongpeitkai namar baroh artylli ki kynhun ki long kiba khlain bor bad ha kaba kut jong ka jingialehkai ka Mission SC ka la pynliem noh ia ka Nongdawah SC da 3-2 kol.
Ha ka phai sha kane ka jingialehkai ha ka kylla step ka dei ka kynhun Mission SC kaba la pynkhih jar nyngkong lyngba u Wanpynshngain Synnah ha ka minit ba 25’ lyngba ka jingbuh bol bha da u Biket Nongkhlaw.Hynrei ka Nongdawah khlem da duh mynsiem ka la iakhun tyngeh bad dei tang ha ka minit ba 28’ ka la ioh ban pyniakhaid lyngba u Robert Khongjoh bad ka la ioh lad ban bynrap sa kawei pat ha ka minit 31’ lyngba u Dibin Nongspung bad tam kylla da 2-1 ia ka Mission. Bad ka Nongdawah ka la ioh sa kabu ban thep ia ka kol b lai lynba u Dibin u ba ioh pynher shakhmat marwei ia ka bol hynrei u la shah woh kjat ha Dancing Mukhim bad u referee u la mareh beit beit u la sei bluit da ka red card bad beh shisyndon ia une u player shabar.
Kane ka jingshah beh player jong ka Mission ka la pynioh bor shuh shuh ia ka Nongdawah bad ioh nam tam da 2-1 haba kut jong ka kylla step.
Haba wan phai sha ka kylla miet ka Nongdawah ka la sdang leh jem namar ba la ioh ka nam tam hynrei ka Mission wat tang shiphew ngut briew ruh ki la iakhun dohiap bad kane ka la seisoh da kaba ki ioh ban pynkhih pyniakhaid biang lyngba u Kenstar Warshong ha ka minit ba 50’ jong ka jingialehkai. Bad ka Nongdawah SC ka la nang duh bor shuh da ka jingshahbeh noh u Stephen Pale namar ka jingioh Yellow arsien ka jong u.
Hynrei shuwa ban pynkut u referee u mut pynwai ia ka wisil ba khatduh ban jam pat sha ka Extra time hadien ba la rah ia ka additional time kaba 2 minit kyndit kyndit ka Mission lyngba u rangialehkai kynsai jong ka u Pynbha Suting u la ioh ban khyrwit tyngeh ia ka bol hapoh ka area jong ka kol ban btin syndon ia ka Mission SC sha ka Semi-Final jong ka MGFL 2018-19.
Ha kane ka jingialehkai u rangialehkai ka Misson Kenstar Warshong u la ioh rah ka nam Man of the Match.
Ha ka jingialehkai Semi-Final jong ka 2nd Division jong ka MGFL Ka Thangshalai SC ka la pynliem ia ka Mawiong SC na thain Diengpasoh da 3-1 kol . Ia kane ka kol jong ka Thangshalai la khyrwit tang u Bickyson Kharkongor u la ioh hattrick bad u ba ioh ban thep na bynta ka Mawiong SC la thep da u Risuk Malniang .Da kane ka jingjop ka Thangshalai ka la jam syndon sha ka Final jong ka 2nd Division jong ka MGFl bad kiew kyrdan syndon sha ka First Division jong ka MGFL jong ka aiom ban wan .
Ha kane ka jingialehkai u Bicky Kharkongor ka Thangshalai u la ioh ia ka nam Man of the Match.
Phi don ban ong eiei?