2snem, iap 86ngut na ki aksiden

Shillong,16K’lyngkot:
Katkum ka jingkhein kyllum jong ka tnad pulit kaba peit ia ka jingpyniaid kali ha Shillong, la ong ba tang hapoh san snem mynshuwa kumba 2018 ngut ki briew ki la iap na ki jingjia aksiden ha nongbah Shillong. Hynrei hapoh kine ki ar snem pat ki la don 86 ngut ki briew kiba la duh ei la ka jingim na ki 358 tylli ki jingjia aksiden. Ka tnad Traffic ka la ai jingkhein ba ha u 2012 ki la don 206 tylli ki jingjia aksiden ha kaba 56 ngut ki briew ki la iap bada ha u 2013 haduh u nailur ki la don 152 tylli ki aksiden ha kaba 30 ngut ki briew ki la iap.
Namar ka jingjur palat ki jingjia aksiden, kaba la pynduh ei ia ka jingim jong ki paidbah, ka tnad pulit ka la pynlong ia ka jingpynshai paidbah kaba ka la pynlong mynta ka sngi. Ka Shillong Traffic police ha ryngkat ka jingiatreilang bad ka   Shillong Region Taxi Operators and Drivers Association ka la pynlong ia katei ka prokram kaba la sdang naduh jaka pynieng kali kaba don ha Polo ter-ter ki la iaid sha baroh kawei ka sor Shillong ban pynsngewthuh ia ki paidbah ia ka jingma ki aksiden.
Ha katei ka prokram la wan ban ia shim bynta da ki spah tylli ki Taxi kamai, ki bus sorkar bad ki kali private kiba la rah ia ki pla kad jong ki kaba la thoh shaphang ka jinghusiar haba niah kali ban lait na ki jingjia aksiden.
Haba kren sha ki nongthohkhubor, ha kaba ia dei bad katei ka jingpynshai paidbah u SP ka East Khasi hills   (Traffic) u Bah NK Syiem  u la ong ba ka tnad Shillong Traffic police   (STP) ka la pynlong ia katei ka jingpynshai paidbah ban husiar na ki aksiden bad ban niah adkarda kaba rah ia ki pla kad bad ka tnad ka la pynbna paidbah rurh lyngba ki jingthoh kiba la thoh ha ki jingpynbna kiba la ju wah ha surok lyngba ka jingiarap jong ka Meghalaya Integrated Information System (MIIS) kaba la pyni ia ki jingthoh ha ka kor ba la wah ha manla ki lad bad ki dong.