29tarik kynriah ka High Court ia ka thung nonghikai sia lieh

Shillong, 23 Nailur:
Ka Kashari Megha-laya High Court ka la pynkynriah noh ia ka jingbishar ia ka kam sia lieh ne bamsap thung kam nonghikai LP Skul kaba dei ban long mynta ka sngi namar ba u Amicus Curiae um shym la lah ban wan mih sha ka Kashari.
Ka President ka CSWO ka Kong Agnes Kharshiing kaba buddien ia kane ka kam, ka la ong ba ha ka jingshisha ka High Court ka la buh sngi ban shim bishar ia kane ka kam mynta ka sngi, hynrei namar kane ka daw, ka la pynkynriah noh sha ka 29 tarik Nailur, 2016.
Kham mynshwa, ka Kong Kharshiing ka la ujor ejahar halor kane ka kam bad ka Kashari ka la shim khia ia kane ka kam kaba la tian bishar.
Lah ban kdew ba u Inquiry Officer (IO) u Bah N Thohrem kham mynshwa u la aiti ha ka Meghalaya High Court ia ka kaiphod ka kam Sia Lieh ne ka jyrsieh thungkam nonghikai beain ha ki LP skul ka jylla.
Kane ka jingaiti ka tnad pulit ia ka kaiphod Progressive Report jong ka jingtohkit halor ka kam thungkam nonghikai beain, ka la long hadien ba ka Kashari ha ka jingshong bishar ba la dep, ka la hukum ba ia u SP ka East Khasi Hills ba u dei ban aiti ia ka kaiphod sha ka Kashari hapoh ar taiew ia ka kaiphod jong ka jingtohkit.
Ka Kong Agnes kaba la ujor ehajar halor kane ka kam, ka la ong ba ka Kashari kan sa bishar ia kane ka kaiphod hapoh shi taiew hadien ba u IO uba u dang shu kiew kyrdan kum u DSP, u la wan ban aiti ia ka kaiphod mynta ka sngi ha ka Kashari.
“U IO ba tohkit ia ka bamsap thungkam nonghikai u la aiti ha ka High Court”, la ong ka Kong Agnes bad bynrap ba kane ka kam ka dei ka kam beain kaba shyrkhei bad kiba donkti ki dei ban ioh ia ka jingpynsaja kaba biang katkum ka ain.
“Lada dei MLA ne minister ki dei ban shah pynshitom katkum ka ain. balei ia kiba rit b aria tang shu pharep ruh ki kem wut wut katba ia kiba heh ba hain haba la biang ka sakhi ba la lap ka CBI ruh kim leh eiei”, la kynthah ka Kong Agnes ia ka tnad pulit.
“Ngi la ai FIR halor ka jinglap ka CBI ia ka jyrsieh thungkam beain ha ki LP skul. ka Kashari kam pat kyntait eiei ia ka kaiphod ka CBI”, la ong ka Kong Agnes bad bynrap ba hapoh shi taiew kyrmen ba ka Kashari kan sa leh eiei halor kane ka kam.
Ka Kashari High Court ka la pynmih ia kane ka hukum ba ki pulit ki dei ban ai ia ia kaiphod ia ka jingiaid shaphrang ka jingtohkit halor jing ujor ia ka kam bamsap thungkam nonghikai LP skul kaba la paw pyrthei ha u snem 2009 haba bun ki myntri sorkar, ki MLA khamtam ka myntri ka pule puthi ha katei ka snem ka Kong Ampareen Lyngdoh ka la paw kyrteng ha ka kaiphod ka CBI.