29,600 bilor ki phensedyl kurup ki Custom na ka trok kit piat

Shillong, 5 Rymphang:
Hadien ba la ioh jingtip na ki bor syntiat ka tnad Custom Preventive Unit , Shillong ka la ioh bat ia kawei ka trok kaba don ia u nombar jong ka jylla Nagaland. La bat ia katei ka trok ha ka shnong Thangsalai kaba don ha surok Shillong Bye Pass ha ka 2 tarik mynta u bnai. Na katei ka trok ki Custom ki la ioh kurup 29,600 bilor ki dawai phensedyl kiba la thep buhrieh hapdeng ki byrni piat. Na katei ka trok kit piat ki Custom ki la lap ba don tang 86 byrni u piat katba hapdeng jong ka trok pat la pyndap da ki synduk dawai phensedyl.
La kurup ia kitei ki mar bad kumjuh ruh ia ka trok bad la rejistar kes hapoh ka NDPS Act 1985 , ki mar ba la ioh kurup ki shongdor T.49, 92,752 tyngka. Ha ka jingtohkit kaba nyngkong ka tnad Custom ka la ioh jingtip ba kitei ki dawai phensdyl ki dei kiba kit na Silliguri bad la thmu ban pyniaid sha Bangladesh lyngba ka Agartala. Ka jingtohkit ba shakhmat ia katei ka jingjia ka dang iaid.