Nongstoiñ, 1 Naiwieng:
Ka Khasi Students Union (KSU) Nongstoiñ Circle, mynta ka sngi, ka la ioh ban pdiang kumba 29 tylli ki phom weng Adhaar na ki paidbah nongshong shnong kiba la wan na kylleng ki shnong kiba don hapoh ka thain Nongstoiñ.
Haba iakren bad ki nongthoh khubor, u samla Mixstarwell Samakha Vice President ka KSU Nongstoiñ Circle, u la iathuh ba napdeng ki tei ki 29 ngut kiba la wan ban shim ia ka phom weng na ka thup kyrteng Adhaar ki kynthup naduh ki nonghikai skul ki nongtrei sorkar bad ki riew paidbah.
Shuh shuh u tei u nongialam ka KSU, u la iathuh ruh ba nalor kitei ki 29 ngut ki dang don shibun bah ki briew kiba kwah ban weng noh na ka thup kyrteng Adhaar kiba la wan mih sha ka ophis jong ka KSU, hynrei kim shym la wan rah pat ia ki card Aadhaar ia kaba kila dep ban ioh.
“Kitei ki 29 ngut kiba la wan ban shim ia ka phom kidei kiba sah kum ha ka shnong Upper New Nongstoiñ, Tiehsaw, Mawthawniaw, Siejlieh, New Nongstoin, Porsohsynnam, Dom Mawlien Pyndengrei bad kiwei kiwei” ong u tei u nongiualam ka KSU.
Na ka liang jong u nongthoh khubor u la ioh lad ruh ban iakren bad ki katto katne ki briew kiba la kwah ban weng noh ia lade na ka thup kyrteng u Aadhaar bad haba pyrshang ban kylli ba balei ki kwah ban weng noh na ka thup kyrteng Adhaar don kiba ong ba kila leh ia u Adhaar da ka jingkhmih lynti ba lada ym don Aadhaar, kan sa long ka jingkhang lad ia ki ha kiba bun ki liang phewse kumba ki lap pat kam shymla long kumta.
Shuh shuh don ruh kiba la pynpaw da kaba ong ba ki sngewtieng bad don ruh kiba la babe jur, tang hadien ba kila ioh ia u Adhaar haduh ba kim treh wat tang ban plied bad kila thang bad tar noh shi syndon ia u Adhaar ia kaba ki la ioh bad tang namar ba kwah ban weng noh ia u Aadhaar wat ha pdeng ka jingshitom ruh kim shym la khein shuh, hynrei kila leit ban wad ia ki phom na ka ophis jong ka KSU.
Na ka liang ki nongialam jong ka seng KSU Nongstoiñ Circle kala pyntip ruh sha ki paidbah kiba kwah ban wan shim ia ki phom weng Adhaar ba kin sngewbha ban wan sha ka ophis jong ka seng kaba don hajan ka Shipara Restaurant ha Nongstoiñ bad ruh ba kin sngewbha ban wanrah ruh artad ia ki Adhaar Card ki jong ki.