Shillong: Ka Raid Nong khlieng ryngkat ka jing iatreilang bad ka ophis treikam jong ka Pynursla Civil Sub Division kan pynlong ia ka tamasa ‘Spring Festival: Lake Side Fiesta’ ha ka shnong Langkawet ha ka 28 haduh 29 tarik rymphang 2020. Ia kane ka tamasa yn pynlong ha ka wah ‘Ribit Lake and Resort’ ka ba don ha ka shnong Langkawet Pynursla.
Haba kren bad ki lad pathai khubor u ophisar ka SDO Pynursla u D. Hynniewta, u la ong ba ka thong ba nyngkong ban pynlong ia kum kine ki tamasa ha kane ka thain kadei ban saphriang pyrthei ia ka jing itynnad jong ki shnong ki ba don hapoh ka thain Pynursla.
“Kum u ophisar jong kane ka thain nga kwah eh ban kyntiew ia ka kam jngoh kai pyrthei hapoh kane ka thain namar ki bun bha ki jaka bad ki shnong kiba itynnad bad ki ba ki bun ki paidbah (Tourist) kim pat tip ba don kum kine ki jaka ba itynnad hapoh kane ka shnong ne sha kiwei pat ki shnong jong ka thain” u la bynrap.
U la ong ruh ba ka ophis jong ka SDO Pynursla ka buh ia ka thong ban kyntiew ia ki kam jngoh kai pyrthei hapoh ka thain bad ruh ban pynshlur ia ki khynnah samla ka thain ban mih sha khmat ban seng ia ki kam jngoh kai pyrthei hapoh ka thain.
U D. Hynniewta u la ong ba ka thain hapoh ka Pynursla ka don bun ki jaka jngoh kai pyrthei hynrei namar ka jing bym biang ki rukom saphriang pyrthei bun ki ba wan jngoh kai pyrthei ki da tip bha lait noh ia ka shnong Mawlyngnong bad ka Dawki.
Kane ka jaka jngoh kai pyrthei ka ba tip kum ka ‘Ribit Lake and Resort’ ka hapoh ka shnong Langkawet bad ka don ruh ka pung ba heh kum ba 5 acre bad ia kane ka jaka la ai sngewbha da ka Raid Nongkhlieng na ka bynta ban pynitynnad ia ka. Na ka bynta ban pynitynnad ia kane ka jaka ka NEC ka la bei tyngka haduh 1.5 klur tyngka sha ka tnat jngoh kai pyrthei.
Ia ka tamasa ‘Spring Festival: Lake Side Fiesta’ la pynlong khnang hapoh ka ‘Ribit Lake and Resort’ na ka bynta ban pynithuh pyrthei bad ban plie paidbah ia kane ka jaka kum kawei na ki jaka jngoh kai pyrthei ka ba don hapoh ka thain Pynursla. Ia kane ka tamasa yn wan plei paidbah da u myntri rangbah ka jylla u Conrad KSangma lem bad u symbud myntri rangbah u Prestone Tyngsong.
Phi don ban ong eiei?