271ngut kem mynder ka KSU Narpuh

Shillong, 18 Nailar:
Kum shi bynta ban khanglad ia ka jingrung kyrthep jong ki bar jylla bad mynder ri shapoh ka ri Hynniewtrep, ha ka 12 bad 13 tarik mynta u bnai, ka KSU Narpuh Circle hapoh ka jingialam u President jong ka U samla Syrosse Lamare bad u General secretary U Samla Kwilness Suchiang ki la ioh kem ia kumba 271 ngut ki mynder ri ha Sonapyrdi kaba don hajan ka jingkieng Lukha (EJHD). Ha ka jingtohkit ia kid a ki dkhot ka seng, la lap ba, kumba 128 ngut na ki kim don ia ki kot ki sla kiba biang ban shah ia ki ban iaid lyngba kitei ki thain. Ha kane ka sngi, la khynra ia ki kali ba wan na ki thain Silchar, Kalain, Hailakandi, Badarpur bad kiwei de ki thain khappud bad ka Bangla nangtei kum ki sumo, ki night super, ki trok thylli bad kiwei de ki kali.
Ka seng ka pympaw ia ka jinglyngngoh ia ka jingioh wan laitluid ki mynder ri khlem da tehkyndon ia ki da kita ki bor ain ka sorkar khamtam ba baroh kine ki mynder ri ba ioh bat ki dei kiba hap iaid lyngba ka Infiltration Check Gate(ICG) kaba don ha ka shnong Ratacherra.
“Ka jingdon ka ICG ha Ratacherra ka long ka bym myntoi namar kim shimkhia ban bniah ia ki mynder ri kiba iaid lyngba katei ka jaka shapoh ka jylla khlem ki kot ki sla ba biang “, la pynpaw u samla Syrosse Lamare. “Ka seng ka kynthoh jur ba kane ka jingiohlaitlan ki mynder ri ban rung shapoh ka ri Hynniewtrep jong ngi ka long namar ba ka Infiltration Check Gate kaba don ha Ratacherra ka dei tang ka khyrdop lum pisa jong ki pulit ka ICG”, la pynpaw shuh shuh u samla Syrosse Lamare.
Halor kane ka seng kan sa leit shen ban dawa na ka sorkar ban pynkhlain ia ki Infiltration Check Gate kiba la don lypa bad ruh ban dawa na ka sorkar ban buh kawei hapoh ka Narpuh Elaka.