Shillong, 13’lyngkot:
Ka High Court jong ka Meghalaya mynta ka sngi ka la shong bishar halor ka jingujor ba ka la ioh ba ka la don ka jingshah kheiñ beiñ bad ka jingshah kheiñpoh ki jaitbynriew rit paid ha kane ka jylla kum ka Niam Khasi ne ka Niam Tre, ha katei ka jingtian bishar kaba la long mynta ka sngi ka sorkar Meghalaya ka la jubab sha ka High Court ba kam don kaba kum kata kumba la kynnoh hynrei ki rit paid ha kane ka jylla ki ioh ia ka hok kumba ioh lem kiwei pat.
Hynrei ha katei ka jingshong bishar u bah H.S Thangkhiew u la kyntait ia katei ka jingkam u Chief Secretary ka jylla u bah PBO Warjri, u bah Thangkhiew u la ong ba ym don ki skul ne ki khynnah skul kiba aplai ia ki scholarship ki ba laioh ia ka jingmyntoi namarba ym shym la don kata ka jingpynbna ba iar ba ki dei ban io myntoi.
Hynrei katkum ka Affidavit ba la thoh da u bah Warjri pat ka pyni ba ha ka 21 tarik u nohprah, 2015 ka la don ka jingbthah ban thaw ia ka Task Force Committee na ka bynta ba peit ia ki jait bynriew rit paid ne ki kynhun kiba rit paid ha kane ka jylla. “Ngi sngewlyngngoh ba ka sorkar ka thaw ia katei ka komiti hadien 23 snem ba la wan ka National Commission for Minorities Act, 1992 kaba la wan ha ka 17 tarik u jymmang, 1992 bad kata ruh hadien ba la kashatri ka la pynmih ia ka hukum” ong ka Fulla Bench jong ka High Court.
Ka ing bishar ka la kylli la ka don ne em kata ka ripod kaba la dep ai halor ka jingtreikam katei ka komiti ka kong T.Dkhar Chairperson jong ka Task Force Committee ka la kular ha ka ing bishar ba kan pynpoi hapoh ka lai taiew.
Ka High Court ka la pynmih ia ka hukum ba hadien ba la dep ban pynpoi ia ka ripod jong ki jaitbynriew kumba la pynmih ha ka hokum kaba kham ha shuwa, ka sorkar jylla ka dei ban phah sha ka sorkar pdeng ban pyntip bad ioh ia ka jingmynjur jong ka bad ban pyntip ruh ba kita ki jaitbynriew ne ki kynhun ki dei kiba rit paid bad ei ban pynthikna ba kita ki kynhun ne ki jaitbynriew ki dei ban ioh ia kata ka jingmyntoi ba ki dei ban ioh na ka sorkar jylla bad sorkar pdeng. “Ia katei ka kam baroh kawei dei ban pyndep hapoh ka 8 taiew naduh ba ioh ia kane ka jingthoh” jong ka Full Bench jong ka High Court kaba shong bishar mynta ka sngi. Ka High Court mynta ka sngi ka la kren thlia ruh halor ka jingbym wan mih u Secretary, Ministry of Minority Affairs, ka sorkar India. Ka la ong ba la pyntip da ka sorkar India ba ka hukum ba la dep kaba la khot hajir ia u Secretary la dep ban pynpoi hynre ym shym la ioh jingtip pat haduh mynta ruh.
“Namarkata, ngi pynmih ia kane ka hukum ba u Secretary u dei ban wan hajir ryngkat ka jingioh jami kaba T.20 hajar tyngka bad u dei ban pynthikna ban poi khnang ha ka sngi shong bishar ka ban wan” ong ka High Court. Ka High Court ka la hukum ruh ba ia katei ka jingkhot hajir jong ka ia u Secretary dei ban kitkhlieh da u Police commissioner, Delhi, ban pynthikna ba u dei ban wan mih ha katei ka sngi. Ka la hukum ruh ba ka kong T.Dkhar, Chairperson, Task Force Committee, ba ka dei ban wan mih khnang ha ka 27 tarik ka sngi ban shong bishar biang.
Phi don ban ong eiei?