New Delhi: Hynnin ka sngi, ki 12 tylli ki seng liang pyrshah, ki ai ia ka jing kyrshan ia ka jing iakhih ki nongrep, ha ka 26tarik Jymmang bad na kitei ki 12 tylli ki liang pyrshah, ki don 5ngut ki myntri rangbah jong ki jylla bapher.
Ka SKM, kaba dei ka kynhun synrop, jong ki 40 tylli ki seng nongrep, ka la khot ia ka sngi jong ka jingsngew sih lane ka black day bad katei ka long ban rakhe ia ka jingdap ba hynriew bnai jong ka jing iakhih pyrshah, ki nongrep ia ka ain nongrep jong ka sorkar India.
“Ngi ai ka jing kyrshan, ia katei ka jingkhot jong ka Samyukta Kisan Morcha (SKM), ha ka 26tarik Jymmang, ban kynmaw ia ka jing iakhih ba jai jai jong ki nongrep” ong ka kyrwoh na ki seng liang pyrshah.
La soi ia ka kyrwoh, da Sonia Gandhi, nongialam ka Congress, U HD Deve Gowda, myntri rangbahduh ba rim ka India, U Sharad Pawar, nongialam ka NCP, ka Mamata Banerjee (TMC), myntri rangbah ka West Bengal, Uddhav Thackeray (Shiv Sena), myntri rangbah ka Maharashtra, U MK Stalin (DMK), myntri rangbah ka Tamil Nadu bad U CM Hemant Soren (JMM), myntri rangbah ka Jharkhand.
Kiwei pat kiba soi, ki long U Farooq Abdullah, nongialam ka NC bad myntri rangbah barim ka Jammu and Kashmir, U Akhilesh Yadav, nongialam ka SP bad myntri rangbah barim ka UP, U Tejashwi Yadav, nongialam ka RJD, U D Raja jong ka CPI bad U Sitaram Yechury jong ka CPI-M.
Kitei ki liang pyrshah, ki dawa ruh ban weng noh mador ia katei ka ain nongrep bad ban pynthikna ia ka dor iarap jong ka sorkar lane ka MSP bad katei ka dei halor ka shithi, kaba la dep thoh, da ki liang pyrshah, ha ka 12tarik Jymmang 2021.
Ka jingkhot, ha ka 26tarik, ka dei ban rakhe kum ka sngi jong ka jingsngew sih bad la khot ia katei ka jing iakhih, da ka Samyukta Kisan Morcha, ba la khlieh da U Balbir Singh Rajewal.
La khot ia ki paidbah ha kylleng ka Ri, ban pynher ia ki lama iong ha ki iing jongki, ha ki kali bad ha ki dukan ruh kumjuh.
Ki 40 tylli ki seng, ha ka jing ialam ka Samyukta Kisan Morcha, ki don mynta ha u pud jong ka jylla Delhi bad ki la bteng ia kane ka jing iakhih, la hynriew bnai kynthih.
Phi don ban ong eiei?