26tarik, yn ia ther ki MLA ka MDA, halor ka jingkynnoh ka BJP

Shillong: U symbud myntri rangbah ka jylla u bah Prestone Tynsong ha ka sngi ba ar, u la ong ba ia baroh ki jingkynnoh, kiba la mih na ka liang jong ka party BJP, yn sa iakren ha ka jingialang jong ka MDA co-ordination Commitee ka ban sa long ha ka 26 tarik mynta u bnai.

Haba iakren bad ki lad pathai khubor na ka liang jong u bah Prestone, u la ong ba ha 26 tarik u Naiwieng 2020 kan don ka jingialang jong ka MDA Co-ordination Commitee, ha ka ba yn sa wanrah ia baroh ki jingkynnoh jong ka party BJP ha kane ka jingialang kynthup ia ka kam bamsap ha ki 2 tylli ki District Council.

U la ong ruh ba ha kane ka sngi na ka party BJP, u bah ALHek bad u bah Sanbor Shullai, ki la dei ki nongmih khmat ki ban wan shimbynta lang ha kane ka jingialang.

U la kyntait ruh ban don kano kano ka jingkyntait ia kino kino ki MLA kiba don lang ha ka Sorkar MDA da kaba u ong ba kam don kano kano ka jingniewbein ia u no uno u MLA u ba don ha MDA bad baroh ki rai ba la ju shim da ka sorkar MDA ki dei ki ba la iasngewthuh jingmut lang da baroh ki MLA kiba don ha sorkar.

U la ong ruh “Kumba nga la dep ban ong ba lada ka BJP kam hun ban ia don ryngkat ha ka Sorkar MDA ki lah ban mih noh na ka sorkar MDA bad ia kane nga dang kren kumjuh haduh mynta”.