Shillong: Ka lumpung ialehkai I-League 2018-19 kan sdang ha ka 26 tarik mynta u bnai ha kaba ka lahduh mynshem snem ka Minerva Punjab FC kan iakhun ia ka Churchill Brothers Sports Club, ka Chennai City FC kan iakhun ia ka Indian Arrows.
Katba ka kynhun na kane ka nongbah ka Shillong Lajong FC kan iakhun pyrshah ia ka Aizawl FC ha ka 28 tarik ha JN Stadium, Shillong por 5pm.
Ha kane ka kynti, ki don lai tylli ki kynhun na kane ka dong mihngi kiba iakhun ha ka i-league kaba kynthup ia ka Shillong Lajong FC, ka Aizawl FC bad ka North Eastern Re Organising Cultural Association (NEROCA) na Manipur.
Ka i-league 2018-19 kan sakhi ia ka jingiakhun ban iaknieh ia ka nam lahduh jong 11 tylli ki kynhun kiba kynthup ia ka Aizawl FC, Chennai City FC, Churchill Brothers SC, Gokulam Kerela FC, Indian Arrows, Minerva Punjab FC, Mohun Bagan, North Eastern Re Organising Cultural Association (NEROCA), East Bengal, Real Kashmir bad ka Shillong Lajong FC.
Ia ki jingialehkai yn sa pyni live ha ka Star Sports Network. Ka kynhun kaba la rah ia ka nam lahduh kan ioh ban iakhun ha ka lympung AFC Champions League qualifier.
Ha kane ka I-league ba mynta ka kynhun ba rung thymmai ka dei ka Real Kashmir Football Club na Jammu and Kashmir kaba kiew na ka 2nd Division League.