26 ngut sha ka NPP, 3 sha ka BJP ha GHADC

Shillong, 9 Nailur:
Lashai ka sngi ka 10 tarik u nailur ka NPP kan pynbna paidbah ia ki kyrtong elekshon GHADC jong ka. Ki tyllong khubor ki la iathuh ba ka NPP kan pyniakhun tang 26 ngut ki kyrtong na ki 29 tylli ki Konstitwensi, katba 3 tylli pat la ong ba kan kyrshan ban pynjop ia ka BJP.
Katkum ka jing iathuh ki lad khubor ki la ong ba ka NPP mynta sngi ka la raikut ban jied tang 26 ngut ki kyrtong ia khun elekshon na ki 79 ngut kiba la pan tiket, bad ia ka kyrteng jong ki yn pynbna paidbah lashai ka sngi ka 10 tarik u nailur. La ong ba haduh ba thoh ia kane ka khubor ki nongialam ba ha khmat ka NPP mynta ki dang don ha nongbah Delhi ban ia kren pynbeit bad ka BJP na bynta ka elekshon GHADC.
Katkum ka jingtip kaba la iohlum la ong ba ki lai tylli ki konstitwensi ba ka NPP kan kyrshan ia ka BJP kin dei kito ki konstitwensi kiba bun na ki nongshong shnong ki dei na ka niam Hindu kynthup ka Konstitwensi kaba hajan u myntri rangbah ka jylla ka Betasing Konstitwensi. Ki lai tylli ki konstitwensi kiba ka NPP kan kyrshan ia ka BJP ki long ka Nagoapara konstitwensi, ka Jikjak konstitwensi bad ka Betasing Konstitwensi.
Ki lad khubor ki la iathuh ruh ba ka NPP ka la pyrshang ban ia kren bad ka UDP ban ia treilang ha katei ka elekshon GHADC ban pynliem ia ka seng Congress hynrei ki tyllong khubor na ka NPP ki la iathuh ba ka jingiakren hapdeng katei ka seng bad ka UDP ka long da kumwei katba ka kam pat ka UDP ka leh da kumwei pat. Namar katei ka jingbym pyni ka UDP ia ka kam kumba la ia kren ka NPP kam shym la shimkhia shuh hynrei ka jingiatreilang ha ka elekshon GHADC ka ban long ha ka 12 tarik u risaw la ong ba kan long tang bad ka BJP, katba hadien ba la mih ka resol elekshon pat ki lah ban ia treilang ha kawei ka kynhun ban ia thaw EC, ong ki tyllong khubor.
Haba wad jingtip ia ka lyer elekshon ha ri Lum Garo ha kine ki sngi ki lad khubor ki la iathuh ba ka lyer elekshson ka kham shongshit bha sha ka seng NPP bad UDP, katba ka Congress pat la ong ba ka la kham dait thah ym kumba ju long ha ki elekshon ba la dep.