25tarik yn poi Shillong u heh AICC

Shillong, 16 Risaw:
U President ka Meghalaya Pradesh Congress Committee (MPCC) Bah DD Lapang u la kubur ba ka party kaba heh kum ka Congress ka don beit ka jingiakhih jong ki MLA bym hun iano iano hapoh hapoh hynrei kam dei ban bthei.
Haba kren mynta ka sngi sha ki nongthoh khubor, u Bah Lapang u la ong ba ka jingiakhih ki dkhot ka party ka ju don beit. “Ka jingiakhih ka ju don beit ha ka party kaba heh kum ka Congress hynrei ngim dei ban thang pluh syndon ia ka iing wat haba ngi don ka jingiakhih”, la ong u Bah Lapang.
U la ong ba kum ka party kaba bat ia ka jinglong ryntih, kan wad ia ki lad ki lynti ban pynbeit haba don kano kano ka jingeh jong ki dkhot.
U la iathuh ba u heh ka AICC ba peit ia ka Meghalaya u  V. Narayanasamy  un wan poi ha ka nongbah ha ka 25 tarik Risaw ban iakynduh ia ki nongialam ka party bad ban iakren bad kiwei kiwei ki kam.Ha kane ka jingwan jongu, un sngap ia ka mat kaba u Bah Pynshngain N Syiem u la kren pyrshah ia u Myntri Rangbah ka jylla u Mukul Sangma.
Ha kajuh ka por,u la ong ba ka party kam kwah ban tuklar ia ka rai shimet jong u Bah Pynshngain N Syiem ban nym iehnoh ia ka kam MDC wat hadien ba la pdiang da ka iing dorbar ia ain khang bam ar maloi.
“Ka party kam lah ban pynbor ia u ban iehnoh ia ka kam MDC. Ka dei ka kam shimet jongu (Pynshngain) bad u la ong ba u long uba la khreh ban iakynduh ia kano kano ha ka jingiakhun”, la ong u Bah Lapang.