25klur bad ka sut bat kai ka sorkar ia ka bhah ka GHADC

Shillong, 03 Lber:
U nongialam ka NPP u Conrad K Sangma u la ong ba ka sorkar jylla hapoh ka jingialam jong u Myntri Rangbah u Mukul Sangma, ka dei ban pynlait noh ia ka pisa kaba T. 25 klur jong u snem 2010-11 ba dei ka bhah jong ka GHADC.
“Ka bhah ka GHADC kaba dei ban ioh na ka sorkar jylla jong u snem 201-11 ka dei baroh 20 klur eiei bad khein lang bad ka sut ba 5 klur hapoh kine ki snem ba ka sorkar kam shym la pynlait, ka la long sha ka T. 25 klur”, la ong u Conrad haba kren sha ki lad pathai khubor mynta ka sngi ha Shillong.
“Ngi dawa ba ka sorkar ka dei ban pynlait noh wut wut ia kane ka pisa khlem pynslem shuh”, la ong u Conrad.
U la ther ia kane ka sorkar jylla kaba la ialam da ka Congress ba ka la treikam lymmuh khamtam ha GHADC namar ba wat ki jingkhein jingdiah ruh, kim biang ha kine ki snem ba la dep.
U la ong ba ka Executive Member (EC) kaba la dep ba la ialam da ka Congress ka khlem pat siew ia ka tulop saw bnai ia ki nongtrei ka GHADC bad sa mynta hadien ba la shimti ka EC thymmai da ka NPP, ki khlem pat ioh tulop saw bnai  bad baroh ka la poi sha ka phra bnai eiei ba kim pat ioh tulop. Katkum ka jingong u Conrad, ka daw baroh ba ki nongtrei ka GHADC kim ioh tulop ka dei namar ka jingleh bym suidniew kane ka sorkar ba ialam da kane ka sorkar jong u Mukul ka bym shym la pynlait ia ka bhah jong ka GHADC.
“Kane ka sorkar Congress kam shym la pynlait lut ia ka bhah jong ka GHADC kaba dei ban ioh da ki klur bad namar kane ka daw, ka GHADC ka la iakynduh jingeh”, la ong u Conrad.
U la ong ba ka sorkar ka dei ban ai bhah noh baroh ia ka khajna na ki kali ia ka GHADC kumba leh ia ka JHADC. “Katkum ka jingtip jong ngi, ka JHADC  ka ioh bha 100 percent na ki kali, katba ka KHADC ka ioh 60 percent bad ngi dawa ban ai bhah khajna 100 percent ia ka GHADC”, la ong u Conrad.
Ha kawei ka liang, u Conrad u la ong ba ki nongtrei ka GHADC naduh ki EM, haduh ki peon kin pynlong ia ka jingiatrei ei kaba shi sngi ban ai rong ia ka ophis ka GHADC kaba la rim bha.
“Ngi la iarai ba baroh ki nongtrei ka GHADC, naduh ki EM haduh ki peon kin trei ei shi sngi ban ai rong ia ka ophis ka GHADC, kaba long shi bynta noh synniang namar ka jingkyrduh pisa ka Council”, la ong u Conrad.