25 square metre ka iing, ka jinglut T.1.30lak, na ka PMAY skhim; T.12 hajar ban shna painkhana & T.18hajar na ka MGNREGA

Shillong:Ha ka dorbar mang tyngka, kaba dang shu dep ha ki khyndiat sngi, ka sorkar India, ka la pynbna ban tei ia 80lak tylli ki iing baduk, ha shwa ka snem 2022-23 bad kitei ki dei kiba la dep kynthup ha ka skhim shna iing, kaba la tip, ka PM Awas Yojana bad la dep mang pisa T.48 hajar klur, na bynta ban tei ia kitei ki 80lak tylli ki iing.

Ka sorkar India, ka kwah ban pynthikna, ba baroh ki nong India, kin don ia la ki jong ki iing, ha kitei ki snem ba la mang.
Haduh ka 1tarik Kyllalyngkot 2020, la jied ia ki 4,427 tylli ki nongbah ka India, ha kaba 472 tylli ki dei ki Class I bad kitei ki dei kiba la ioh jing myntoi na ka skhim PMAY-U. Nangta, ha ka3tarik Kyllalyngkot 2022, la mang pisa ban shna iing 1.14klur tylli bad na kitei, la dep trei pyndep, ia 53.42 lak tylli ki iing bad la aiti ruh sha ki trai iing. Na kitei ki don 16lak tylli, kiba la shna da ka buit shna iing kaba thymmai. Ha kane ka skhim PMAY (U), la pynthikna ruh ba ka kynthei, ka dei ban long ka trai iing, lane ka dei ban long trai lang, ha ka jingshna ia katei ka iing baduk.

Ha kane ka jingmang thaw iing kaba mynta, la mang ban pynheh ia ka iing, na kaba long mynta 20 square metre sha ka 25 square metres, nangta ka jingmang pisa, ha kaba la pynheh na ka T.70 lane T.75 hajar, ha kaba tei ia kawei ka iing, sha ka T.1.20 haduh T.1.30lak na ka bynta ban tei ia kawei ka iing bad nangta la mang sa T.12hajar, ban tei ia kawei ka painkhana bad nangta la ai lad ba kin trei sa 90 haduh 95 sngi, na ka skhim MGNREGA bad katei kan pynmih bai nong T.18,000 ba kin pyndonkam, ha katei ka jingshna iing jongki.

Ka kyrwoh, ka ong shuh shuh, ba ka PMAY (Gramin & Urban) ka don jingthmu ban pynbiang ia ki iing sah kiba skhem sha ki lai klur tylli ha ki jaka sor bad sa 2 klur tylli, ha ki jaka nong kyndong bad kitei ki dei, na bynta kito kiba duna ka ioh ka kot bad kiba shong ha ki iing kiba jot rathai bad haduh ka 24tarik Kyllalyngkot 2022, la dep tei ia 1.70klur tylli ki iing baduk ha ka skhim PMAY – G bad nangta sa 73 lak tylli, kiba la dep shna ha ka skhim IAY.