Shillong, 13 Nailur:
Ka jingbym khein snep jong ka sorkar ia ki nonghikai ka la pynlong ia ki nonghikai hapoh ka lama jong ka Joint Action Committee of All Teachers’ Association of Meghalaya (JACATAM) ban rai ban pynlong da ki jingiakhih ba kham tyngeh lada ka sorkar kam khot iakren ia ki hapoh ka 23 tarik mynta u bnai.
Haba kren mynta ka sngi Thohdieng hadien ba la wai ka jingialang, u Chairman jong ka JACATAM u Bah ED Nongsiang u la ong ba ba ki nonghikai kila phah ka shithi ba ki kwah ba kin ia kynduh ia u Myntri Rangbah ka Jylla u Mukul Sangma bad lada ka sorkar kam khot iakren ia ki hapoh kane ka sngi ba ki la buh, na ka liang jong ka JACATAM ki la rai ban pynlong da ka jingiaid paidbah (procession) ha ka 24 tarik mynta u bnai bad lada ka dang iai sngap mynthi ki nonghikai ki la rai ban pynlong da ka jing sangeh trei khlem buh por, naduh ka 25 tarik ter ter.
Ha kane ka jingiaid proseshon, ki nonghikai ki la kyrpad ia ki kmie ki kpa, ki khynnah bad kito kiba snegwkhia ia ka pule puthi, ba kin iamih ban iasnoh kti lang ban iaid paidbah sha Secretariat. Kane ka jingiaid paidbah kan long kaba heh tam ha ka jylla, lada ka sorkar khot iakren noh shwa ia katei ka sngi, la ong ki nonghikai.
Ha kajuh ka por, ki nonghikai ki la pynkut ia ka jingiadei bad u Symbud Myntri Rangbah u Dr RC Laloo lada um kylla ka jingleh kuman.
“Ngin nym treh iakren shuh lada khot u Dr RC Laloo”, u la ong Bah Nongsiang bad bynrap ba tang lada khot u iakren u Dr Mukul Sangma kin leit ban iakren.
U Bah Nongsiang ruh u la ong ba ki nonghikai ki la rai ban ym leit iakren shuh lada khot u Symbud Myntri Rangbah jong ka pule puthi u Dr RC Laloo namar ba u la khein dewthala ia ki nonghikai bad u la leh kuman watla ki la kyrpad bunsien shwa ba kin shim ia ka lynti ka jingiakhih. “Hynrei lada bthah u Myntri Rangbah ban leit iakren, ngi lah ban leit, hynrei ym ban ioh ia ka jingkhot na u Dr Laloo”, la ong u Bah Nongsiang.
U Bah Nongsiang u la ong ba ha kano ka rukom ka jingkhang bad ka pyrda jong u Dr Laloo ka plie haba ki nonghikai ki leit tied man ka por ka khang kdam kdam.
“Lehse ka jingkhang u Dr Laloo ka plie tang ia kiba u sngew kwah ne mon ban khot”, la kynthah u Bah Nongsiang bad bynrap ba, ki nonghikai skul la bunsien ki la leit ban tied jingkhang ba kwah ban iakynduh hynrei um plie satia haduh ba kin mih sha madan syndon.
U Bah Nongsiang u la ong ba naduh u snem 2012 ki la phah shithi sha u Myntri jong ka pule puthi ba ka sorkar ka khot ban iakren ia ki halor ka jingeh jontg ki nonghikai hynrei haduh mynta ka sorkar ka leh bym suidniew ia ka jingdawa jong ki nonghikai haduh kine ki sngi ka sorkar ka iai leh kum bym tip ia ki jingeh jong ki nonghikai.
Shuh shuh la ong ruh ba ki nonghikai ki dawa ba ka sorkar kan shimti tang ia ka kam hikai ym ba kan shimti ia ki rukom pyniaid hynrei ka sorkar kam lah ban pynurlong ia ka jingdawa jong ki katba ha kiwei ki jylla ka sorkar ka lah bad iatreilang bad ki nonghikai.
Na ka liang jong ka JACATAM ruh ka ai khublei ia ki seng ki ba la lah ban kyrshan lang ia ki ha kane ka jingdawa kiba kynthup ia ka seng KSU, HNPF, SSSS, KHNAM.
Lah ban kdew ba ki nonghikai ki la dep ban pynlong ia ka jingiakhih naduh u bnai ba la dep. Ha ka 27 tarik Nailar, ki la deng lama iong, 29 tarik, shu leit soi kyrteng, 3 tarik Nailur ki shim shuti, 4 tarik ki shhong dharna, bad 5 tarik ki pynlong rally. Nangta, naduh ka 11 haduh 13 tarik Nailur, ki la sangeh treikam, hynrei ka sorkar kam khot iakren satia.
Phi don ban ong eiei?