Shillong, 15’lyngkot:
Ha ka 24 bad 25 tarik mynta u bnai ki 4385 ngut ki nonghikai kiba ialeh ia ka exams ban pyntbit ha ka kam hikai, ka Diploma in Elementary Education (D.El.Ed) batch 2013 kiba kynthup ia ki nonghikai SSA, Govt, Ad hoc bad Deficit kiba hikai ha ka elementary level, ka Meghalaya SSA School Association (MSSASA) Central Body ki la rai ban pynlong jingiakhih da kaba leit shong kyraiñ hakhmat khyrdop ka ophis treikam ka NIOS Shillong (Dharna) kaba don ha Laitumkhrah ha ophis jong ka Directorate of Educational Research & Training (DERT) Shillong .
U bah Aristotle C. Rymbai President ka MSSASA Central Body haba ha ka kyrwoh kaba la phah sha ki lad pathai khubor , u la ong ba ia kane ka rai la shim ha ka CEC jong ka MSSASA kaba la long ha ka 12 tarik mynta u bnai. “Lada ki bor pyniaid ka NIOS kim lah ban pynurlong ia ki jingdawa kiba kynthup ban pynbeit ia ki kynrum kynram ha ka resol, ban ai da ka jingthoh halor ban pynjlan ia ka por jong ka D.El.Ed course bad ki tarik ban pyndap ia ki phom ban ialeh biang ia ka eksamin jong ki sobjek ba shah bat hapoh shitaiew kata ha lane shwa ka 23 tarik mynta u bnai , ka synjuk kan iaid shakhmat ia ka jingshong kyllain mungor ha ka 24 bad 25 tarik mynta u bnai ka ban sdang naduh ka por 11 : 30 mynstep haduh 2 baje janmiet” .
Haba pynpaw ia kajuh ka sur, u bah H.M. Marbaniang General Secretary ka MSSASA Central Body u ong kane ka jingleh thurmur jong ka NIOS ka la ktah shikatdei eh ia ki 4385 ngut ki nonghikai kiba la bei pisa da ka Sorkar Jylla ban phah leit pyntbit ha ka kam hikai lyngba ka D.El.Ed kaba ka Sorkar Jylla ka iateh bad ka NIOS khamtam ia ki nonghikai SSA kane ka jingpynslem ka NIOS ban pynbeit ia ka result kala pynduh ia ka hok jong ki ban ioh jingmyntoi na ka jingpynkiew tulop thymmai jong ka Sorkar Jylla. “Leh bakla ka NIOS , shah ktah bad hap siew dor ki nonghikai” shano ka hok ki nonghikai kiba ngi khot ki nongsaindur ia ki khun ki kti jong ngi bad ka ri hi baroh kawei, buh jingkylli ka MSSASA.
Katei ka kyrwoh ka la ong ba ki la dep ia kynduh ruh ia u Dr Chandra Bhushan Sharma Chairman ka NIOS ha ka 13 tarik Nohprah , 2016 ha headquater ka NIOS ha Noida , ia kaba u la kular ban pynbeit ia kitei ki jongbakla baroh hynrei haduh mynta ka shu sahkut kumjuh. “kane ka long tang ka jingsdang jong ka jingiakhih bad lada ka NIOS kam lah ban pynurlong ia ki jingdawa ngin nang pynbud shuh shuh sa da kiwei ki prokram iakhih kiba ngin sa pynbna ha ka sngi ba kut kate ika jingiakhih kaba sdang” ong ka kyrwoh na u H.M Marbaniang. Ka NIOS ka la pynmih ia ka resol jong ka D.El.Ed final year batch 2013 ha ka 9 tarik Nailur , 2016 kaba don shibun ki jingduna bad ki kynrum kynram , kata ruh hadien ka jingpynslem kaba 9 bnai kynthih namar ka tarik ban pynmih ia ka resol ka dei naduh 16 tarik Nohprah, 2015.
Phi don ban ong eiei?